प्लमस्टिडमा तीज मान्न महिलाहरुको घुईंचो

लन्डन । साउथ इष्ट लन्डनको प्लमस्टिडस्थित पशुपतिनाथ मन्दिर कमिटीले हरितालिका तीजकै दिन एसियन कम्युनिटी हलमा तीज विशेष कार्यक्रम गरेको छ ।
कार्यक्रममा झण्डै हजार महिला सहभागी भएको आयोजकको विश्वास छ ।

औपचारिक भाषण र खादा प्रवृत्ति अनुशरण नगरिएको उक्त कार्यक्रममा मन्दिर कमिटीका अध्यक्ष बालजंग अर्यालले तीजको शुभकामना दिंदै चेलीबेटीहरु नेपाल जान नसकेपनि माइती सम्झेर तीज मनाउने माहोल 
सृजना गरिएको बताए ।

विनोद ज्ञवालीको संयोजनमा भएको उक्त कार्यक्रममा पण्डित निलहरि घिमिरेले पूजाआजा गराएका थिए ।

कार्यक्रम मन्जु भण्डारीले सञ्चालन गरेकी थिइन् । कार्यक्रममा तीज गीतमा महिलाहरु धित मरुन्जेल नाचे । डिजेको भूमिकामा थिए साउण्ड इन्जिनियर हेम बिष्ट । संयोजक ज्ञवालीले कार्यक्रम सफल बनाउन सहयोग गर्ने मन्दिर कमिटीका समस्त पदाधिकारी, ट्रष्टीहरु र सहभागीप्रति आभार व्यक्त गरेका छन् ।

यसअघि दिउसो एक बजेसम्म व्रतालु दिदबिहिनीहरु प्लमस्टिड पशुपति नाथ मन्दिरमा गएर भगवान शिवको पूजा गरेका थिए ।

तस्विरहरुः कृष्ण सुवेदी, के के मूभिज प्रोडक्सन