मक्कास्थित मस्जिदको क्रेन दुर्घटनामा नेपाली सुरक्षित

साउदी अरब, २६ भदौ । मुसलमानहरुको प्रसिद्ध तीर्थस्थल साउदी अरेबियाको मक्कास्थित मस्जिदमा क्रेन खस्दा ८७ जना तीर्थयात्रीको मृत्यु भएको र दुई सयभन्दा बढि घाइते भएकामा नेपाली भने परेका छैनन् ।

मस्जिदमा सयौँ मानिसले शुक्रबारको प्रार्थना गरिरहेका बेला दिउँसो एक्कासी आएको भारी वर्षा र हावाहुरीका कारण मस्जिदमाथि रहेको क्रेन खस्दा सो दुर्घटना भएको हो । घटनामा परी ज्यान गुमाउनेहरु कुन मुलुकका नागरिक हुन् भन्ने एकिन विवरण आइनसकेको साउदी सरकारले जनाएको छ । घटनामा परी भारतीय, पाकिस्तानी, श्रीलङ्काली, मलेसियाली, बङ्गलादेशी नागरिकहरु घाइते भएको बताइएको छ ।

स्रोतका अनुसार क्रेन खसेको ठाँउमा इरानी नागरिकहरु रहेका थिए । घटनापश्चात उद्धारका लागि साउदी सरकारले तत्कालै आपतकालीन टोली खटाएको थियो । उद्धारका लागि ३९ वटा एम्बुलेन्स र स्वाथ्यकर्मी खटाइएको जनाइएको छ ।

पछिल्लो जानकारी अनुसार उक्त दुर्घटनामा नेपालीहरु भने कोही पनि नपरेको सूचना प्राप्त भएको नेपाली राजदूतावास साउदीका कार्यबाहक राजदूत आनन्दप्रसाद शर्माले जानकारी दिनुभएको छ । हजका लागि अहिलेसम्म ६२० जना नेपाली मुस्लिम साउदी आइसकेको भएपनि सो घटनाबाट सबै नेपाली तिर्थयात्री सुरक्षित रहेको कार्यबाहक राजदूत शर्माले बताए ।

विश्वका मुस्लिम समुदायहरुको सबैभन्दा ठूलो पवित्र तीर्थस्थलका रुपमा रहेको उक्त मस्जिद क्षेत्रलाई बिस्तार गर्ने कार्य भइरहेकोले मस्जिद माथि क्रेन रहेको थियो । निर्माण कार्यका लागि मस्जिदको एक भागमा ठड्याइएको ठूलो क्रेन खसेको थियो ।

विश्वभरबाट हजका लागि यहाँ आउने लाखौँ मुसलमानलाई हज यात्राका लागि स्वागतको तयारी भइरहेको थियो । हज सुरु हुन १० दिन बाँकी रहँदा हजका लागि विश्वभरबाट अहिलेसम्म दश लाख मानिस साउदी आइसकेको बताइएको छ ।