बेलायतमा ७ जुनमा हुने ‘गोर्खा वाक’को तयारी अन्तिम चरणमा

लन्डन – बेलायतको आशफोर्डमा यही ७ जुन २०२६ आइतबार हुन लागेको ‘गोर्खा वाक’को तयारी पूरा भएको आयोजक गोर्खा पिस फाउन्डेशनले जनाएको छ ।

१३ औं वार्षिक ‘गोर्खा वाक’को तयारी अन्तिम चरणमा पुगेको फाउन्डेशनका संस्थापक अध्यक्ष भीमराज तुम्वाहाम्फेले बताउनुभएको हो । आशफोर्डस्थित ग्रेट चार्ट प्लेइङ्ग फिल्ड्समा आयोजना गर्न लागिएको गोर्खा वाक (गोर्खा पदयात्रा)मा यो वर्ष झन्डै ३,००० जनाको सहभागिता हुने आयोजकको अपेक्षा छ ।

वीरता र साहसको सम्मान गर्दै ब्रिटिश सेनाले प्रदान गर्ने सर्वोच्च पदक ‘भिक्टोरिया क्रस’ प्राप्त १३ जना भूतपूर्व गोर्खा सैनिकहरुको सम्झनामा उक्त पदयात्रा आयोजना गरिंदै आएको अध्यक्ष तुम्वाहाम्फेले बताउनुभयो ।

‘हाम्रा नानी छोराछोरीले इतिहास बिर्संदै गए । त्यसैले इतिहासलाई जीवित राख्नु पर्छ भन्ने हिसाबले गोर्खा वाक गर्दै आएका छौं । यसबाट मानसिक र शारीरिक स्वास्थ्य लाभ त हुने नै भयो, यो कार्यक्रमबाट बेलायतमा बसोबास गरिरहेका नेपाली समुदाय र अन्य समुदायबीच समझदारी र सहकार्यमा मद्दत पुग्ने हाम्रो अपेक्षा छ,’ उहाँले भन्नुभयो ।

‘यस पटकको गोर्खा वाकमा नौमती बाजा, नेपालबाट आउने राष्ट्रिय कलाकारहरु साथै हट एयर बलुन शो पनि राखिएको छ । यस पटक हामीले गोर्खा वाकलाई मेलाकै रुपमा मनाउने तयारी गरिरहेका छौं,’ अध्यक्ष तुम्वाहाम्फेले भन्नुभयो । उहाँले भूतपूर्व गोर्खा सैनिक, तिनका परिवारलगायत सबै नेपाली समुदाय र नेपालका मित्रहरुलाई गोर्खा वाकमा सहभागी हुन आमन्त्रण पनि गर्नुभयो । उक्त अवसरमा विभिन्न जातिहरुको कला, संस्कार, संस्कृति देखाइनुका साथै स्कटल्यान्डबाट पनि बिग मोटरसाइकल राइडरहरू आउने आयोजकले जनाउनुभएको छ ।

गोर्खा वाकका विजेताका लागि रनिङ्ग शिल्डलगायत अन्य पुरस्कारको पनि व्यवस्था गरिएको छ। लन्डन र आशफोर्डमा कार्यालयहरु रहेको ए स्टार मोर्गेजेज उक्त पदयात्राको प्रमुख प्रायोजकको रुपमा रहेको छ।

ए स्टार फाइनान्सियल सलुशन्स तथा ए स्टार मोर्गेजेजका प्रबन्ध निर्देशक मिन दर्लामीले ‘गोर्खा वाक’लाई सहयोग गर्न पाउँदा खुसी लागेको बताउनुभयो । ‘नेपाल तथा बेलायतबीच रहेको २०० वर्ष भन्दा लामो ऐतिहासिक सम्बन्ध र गोर्खालीहरुको योगदानको सम्झना चिरस्थायी गर्न युवा पुस्तालाई पनि सहभागी गराएर गरिने यस्ता कार्यक्रम उपलब्धिमूलक हुने हाम्रो विश्वास छ,’ उहाँले भन्नुभयो ।