प्रवासी नेपाली सम्पर्क मञ्च बेलायतद्वारा नेपाल सरकारलाई ९ बुँदे ज्ञापनपत्र, के-के छन् माग ?

लन्डन । नेकपा एमालेनिकट प्रवासी नेपाली सम्पर्क मञ्च बेलायतले नेपालका नवनिर्वाचित प्रधानमन्त्री बालेन्द्र शाहलाई ज्ञापनपत्र पठाएको छ ।

मंगलबार दिउँसो अध्यक्ष पशुपति पोखरेलको नेतृत्वमा नेपाली दूतावास लन्डन पुगेर कार्यवाहक राजदूत विपिन दुवाडीमार्फत ९ बुँदे ज्ञापन बुझाइएको हो । झण्डै दुई तिहाई बहुमतसहित प्रधानमन्त्रीमा निर्वाचित भएकोमा प्रधानमन्त्री शाहलाई बधाई दिँदै नेपाली जनताको अपेक्षाअनुरुप देशलाई स्थायित्व, सुशासन तथा समृद्धिको मार्गमा अगाडि बढाउने विश्वास व्यक्त गरिएको छ।

मञ्चले एमाले अध्यक्षसमेत रहेका पूर्व प्रधानमन्त्री केपी शर्मा ओली र पूर्वगृहमन्त्री एवं नेपाली कांग्रेसका नेता रमेश लेखकलगायतका राजनीतिक व्यक्तिहरूलाई पूर्वाग्रही रूपमा गिरफ्तार गरिएको भन्दै तत्काल रिहा गर्न माग गरेको छ। साथै, जाँचबुझ आयोगको प्रतिवेदन निष्पक्ष नभएको र यसले संविधानको मर्मलाई कुल्चिएको दाबी गर्दै सामाजिक सञ्जालमा बढ्दै गएको अमर्यादित र असभ्य अभिव्यक्तिलाई नियन्त्रण गर्न समेत सरकारको ध्यानाकर्षण गराइएको छ।

ज्ञापनपत्र बुझ्दै कार्यवाहक राजदूत दुवाडीले यथाशक्य चाँडो सम्बन्धित निकायसम्म पुर्‍याइदिने आश्वासन दिएको मञ्च अध्यक्ष पोखरेलले जानकारी दिनुभएको छ ।