गायिका सुमिना लो तामाङलाई ‘योगिता मोक्तान प्रतिभा पुरस्कार’

काठमाडौं । गायिका सुमिना लो तामाङलाई ‘योगिता मोक्तान प्रतिभा पुरस्कार’ प्रदान गरिएको छ ।

नेपाल तामाङ कलाकार संघले शुक्रबार काठमाडौंको जमलस्थित राष्ट्रिय नाचघरमा आयोजना गरेको ४० औं ऐतिहासिक तामाङ एल्बम दिवस तथा गायिका स्व. योगिता मोक्तानको १५ औं स्मृतिसभा एवं योगिता मोक्तान प्रतिभा पुरस्कार वितरण कार्यक्रममा गायिका लो लाई पुरस्कृत गरिएको हो । सुमिनालाई कार्यक्रमका प्रमुख अतिथि वरिष्ठ गायक तथा संगीतकार प्रेम लोप्चन र संघका अध्यक्ष विशाल तामाङले पुरस्कार हस्तान्तरण गर्नुभयो । पुरस्कारमा २० हजार राशि र सम्मान पत्र रहेको छ ।

कार्यक्रममा तामाङ गीतको एल्बम निकालेर तामाङ गीत संगीतमा योगदान गर्ने अग्रज स्रष्टा एवं तामाङ गीतका अभियन्तालाई पनि सम्मान गरिएको थियो । सम्मानित हुनेहरुमा वरिष्ठ अग्रज गायक तथा संगीतकार तिर्थ मोक्तान, अग्रज गायक तथा संगीतकार कृष्णबहादुर तामाङ, अग्रज म्हेन्दोमाया गायक तथा संगीतकार सागर एस वाइबा हुनुहुन्छ ।

कार्यक्रममा तामाङ समुदायका अग्रज स्रष्टाहरु , देश तथा विदेशका विभिन्न संघ संस्थाका प्रतिनिधिहरु, पत्रकारहरु , तामाङ कलाकारहरु, तामाङ गीत संगीतका साथै तामाङ कलाकार र शुभचिन्तकलगायतको उपस्थिति थियो ।

तामाङ भाषा, संस्कार संस्कृति, तामाङ सेलो गीत संगीतका साथै तामाङ स्रष्टाहरुको सम्मान अनि नवकलाकारहरुलाई प्रोत्साहन गर्ने उद्देश्यले नेपाल तामाङ कलाकार संघ वि सं. २०६३ सालमा स्थापना भएको हो ।