नेपाली राजदूतावास लन्डनमा आइतबार विशेष योग ध्यान कार्यक्रम हुने

लन्डन । नेपाली राजदूतावास लन्डनले आइतबार २१ डिसेम्बरमा विशेष योग ध्यान कार्यक्रम आयोजना गर्ने भएको छ ।

संयुक्त राष्ट्रसंघको पहलमा हरेक वर्ष डिसेम्बर २१ मा मनाइने अन्तर्राष्ट्रिय ध्यान दिवसको अवसरमा लन्डन दूतावासले विशेष योग ध्यान कार्यक्रम गर्न लागेको हो । कार्यक्रम बिहान ९ देखि ११ बजेसम्म राजदूतावास परिसरमै हुनेछ ।

शारीरिक, मानसिक तथा आत्मिक स्वास्थ्य प्रवर्द्धन गर्ने उद्देश्यले कार्यक्रम आयोजना गरिन लागेको दूतावासले जनाएको छ । कार्यक्रममा सहभागी हुन इच्छुक सबैलाई आमन्त्रण गरिएको छ ।

स्थान सीमित भएकाले सहभागिता पहिलो आउने, पहिलो पाउने आधारमा सुनिश्चित गरिने र त्यसका लागि अनिवार्य रूपमा अनलाइन रजिस्ट्रेशन गर्नुपर्ने लन्डन दूतावासले जनाएको छ ।