बेलायतमा डा कैनीको नेतृत्वमा ‘नेपाली फर लेबर’ गठन

लन्डन । बेलायतमा डा बच्चु कैलाश कैनीको अध्यक्षतामा लेबर पार्टीको शुभेच्छुक संस्थाको रुपमा ‘नेपाली फर लेबर’ गठन भएको छ । नवगठित उक्त संस्थाको उपाध्यक्षमा बिकास चुडाल, सचिवमा सोलिसिटर दिपक भट्टराई र कोषाध्यक्षमा अंकिता ढकाल रहनुभएको छ ।

यसैगरी सदस्यहरुमा जीत रानाभाट, पुण्य रेग्मी, लक्ष्मी गुरुङ, राजन खकुराल, राम बगाले, कृष्ण भण्डारी, बिपिन निरौला र दिनेश घिमिरे हुनुहुन्छ ।

बेलायतमा कुनै एक राजनीतिक दल आबद्ध एक समुदाय वा कुनै देशका प्रवासी समुदायका मानिसहरु मिलेर आफ्नो राजनीतिक दल निकट शुभेच्छुक संस्था बनाउने प्रचलन छ। बेलायतमा उल्लेख्य संख्यामा लेबर पार्टीका सदस्य र शुभेच्छुक रहेको अनुमान गरिएको छ । बेलायतमा नेपाली मूलका १० भन्दा बढी व्यक्तित्व लेबर दलको सदस्य हुँदै स्थानीय निकायमा जनप्रतिनिधि समेत चुनिएका छन् । यो संस्थामा बेलायतमा बसोबास गर्ने नेपाली, जो बेलायतको लेबर पार्टीको सदस्य वा शुभेच्छुक छन्, उनीहरु जोडिन र आबद्ध हुन सक्ने जनाइएको छ ।

यो संस्थाको उद्देश्य लेबर पार्टीमा सामेल हुन र सक्रिय रूपमा भाग लिन नेपालीहरूलाई प्रोत्साहित गर्ने, नेपाली समुदायमा लेबर पार्टीको लागि चुनावी समर्थन बढाउने, नेपाली समुदायको चासोका विषयहरू लेबर पार्टीभित्र प्रवर्द्धन गर्ने, स्थानीय, क्षेत्रीय र राष्ट्रिय चुनावमा नेपाली प्रतिनिधित्वलाई समर्थन र प्रवर्द्धन गर्ने र लेबर पार्टीभित्र नेपाल-बेलायत सुदृढ सम्बन्धको वकालत गर्ने रहेको डा कैनीले बताउनुभयो ।

बेलायतको सत्तारुढ लेबर पार्टीका सदस्य र शुभेच्छुकहरु यो संस्थामा आबद्ध हुन सक्ने डा कैनीले जानकारी दिनुभयो । छिट्टै कार्यसमितिको बैठक बसेर कार्यसमिति विस्तार गर्नुका साथै विभिन्न विभागहरु पनि गठन गरिने डा कैनीले बताउनुभयो ।