लन्डन । ब्रिटिस गोर्खा सैनिकको ‘इन्टेक २६’ का लागि नेपालबाट ३२३ जना नयाँ प्रशिक्षार्थी राइफलम्यानहरु छानिएका छन् ।
यस वर्ष १४ हजारभन्दा बढी आवेदकमध्येबाट उत्कृष्ट ३२३ जना मात्र ‘इन्टेक २६’ मा छनोटमा पर्न सफल भएका द गोर्खा ब्रिगेड एसोसिएसनले जनाएको छ ।
३२३ जना नयाँ प्रशिक्षार्थी राइफलम्यानहरूले पोखरास्थित ब्रिटिस गोर्खा क्याम्पमा शुक्रबार आयोजित विशेष ‘अटेस्टेसन’ परेडपछि शपथ लिए । उनीहरूले बेलायती राजा चार्ल्स तृतीयप्रति बफादार रहने प्रतिबद्धता व्यक्त गरेका छन् । ब्रिटिस गोर्खा पोखराका अफिसर कमान्डिङ मेजर जेम्स हर्नबीको नेतृत्वमा परेड गठन गरिएको थियो।
अन्तिम चरणमा छनोट भएका ३२३ युवा अब केही दिनमै बेलायत प्रस्थान गर्ने जनाइएको छ । उनीहरूलाई बेलायतको क्याट्रिकस्थित इन्फेन्ट्री ट्रेनिङ सेन्टरमा ३९ हप्ताको सैन्य तालिम पूरा गरेपछि विभिन्न गोर्खा इकाईहरूमा पठाइनेछ।
लेफ्टिनेन्ट जनरल एम आर एल्भिसले समारोहको निरीक्षण गर्नुभएको थियो । प्रारम्भिक निरीक्षणपछि लेफ्टिनेन्ट जनरल एल्भिसले लामो सेवा र राम्रो आचरण पदक, दुई अपरेशनल पदक र दुई कर्णल कमान्डेन्ट ब्रिगेड अफ गोर्खाज पदक प्रदान गर्नुभयो ।
कार्यक्रममा नेपालका लागि बेलायती राजदूत रोब फेन, मेजर जनरल जेराल्ड एम स्ट्रिकल्यान्ड (कर्णल कमान्डेन्ट, ब्रिगेड अफ गोर्खाज) लगायत उच्चपदस्थ सैनिक अधिकारीहरूको सहभागिता थियो । नेपालका तर्फबाट नेपाली सेनाका मेजर जनरल भोलानाथ थापा र नेपाल प्रहरीका डिआइजी दिपेन्द्र जीसी पनि उपस्थित हुनुहुन्थ्यो ।
ब्रिटिस गोर्खाज नेपाल (बिजिएन) का गोर्खा मेजर किरण पुनले नयाँ भर्ती भएकाहरूलाई शपथ गराउनुभएको थियो ।
