ब्रिटेन नेपाल चेम्बर अफ कमर्समा नयाँ नेतृत्व चयन

लन्डन । नेपाली तथा बेलायती व्यवसायीहरुको संस्था ब्रिटेन नेपाल चेम्बर अफ कमर्स (बीएनसीसी)मा नयाँ नेतृत्व चयन गरिएको छ ।

नेपाली दूतावास लन्डनमा शुक्रबार सम्पन्न बीएनसीसीको वार्षिक साधारणसभाले ट्राभल व्यवसायी विराज भट्टको अध्यक्षतामा सर्वसम्मत नयाँ कार्यसमिति चयन गरेको हो । उपाध्यक्षद्वयमा इन्द्र गिरी र कमल पौडेललाई चुनेको छ भने सचिवमा राजेन्द्र श्रेष्ठ चयन हुनुभएको छ ।

सदस्यहरुमा प्रभु न्यौपाने, कृष्ण भट्ट, सन्तोष मण्डल, नाडिया विलियम्स्, अन्जनी फुँयाल, प्रकाश ढुंगाना, अनिल न्यौपाने, दीपक श्रेष्ठ, मोसाद अन्जिज, वीपी खनाल, वसन्त नेपाल, विकास नेपाल र क्याम्पबेल मिचेल चुनिनु भएको छ । संस्थाको सीइयोको जिम्मेवारी स्टिभ बक्ले पाउनुभएको छ ।

बीएनसीसी संरक्षक कार्यवाहक राजदूत विपिन दुवाडीले नवनिर्वाचित कार्यसमितिलाई बधाई तथा निवर्तमान कार्यसमितिको सफल कार्यकालप्रति कृतज्ञता व्यक्त गर्नुभयो ।

नवनिर्वाचित अध्यक्ष विराज भट्टले संस्थाले बेलायतमा रहेका नेपाली व्यवसायीहरुलाई थप समेट्दै नेपालमा लगानी वृद्धिका लागि निरन्तर पहल गर्ने बताउनुभयो । निवर्तमान अध्यक्ष डा. कपिल रिजालले एक अर्कामा सहयोग गर्नु महत्वपूर्ण भएकाले त्यसैका लागि बीएनसीसी गठन भएको उल्लेख गर्नुभयो

कार्यक्रमका सहभागीहरु वरिष्ठ पत्रकार भगिरथ योगी र मोर्गेज एड्भाइजर रमेश सराङकोटीले लन्डनबाट नेपाल सिधा हवाइ उडानका लागि सांसद ग्यारेथ थोमसले इपिटिसन शुरु गरिसकेको अवस्थामा बीएनसीसीको सहयोगबारे धारणा राख्नुभएको थियो । जवाफमा कार्यवाहक राजदूत विपिन दुवाडीले सिधा उडानका लागि नेपाल सरकारले पहल जारी राखेको बताउनुभएको थियो ।

चार्टर्ड अकाउन्टेन्ट तथा व्यवसायी एलएन पाण्डेले ईयूले नेपालको आकाशलाई अझै ब्ल्याक लिष्टमा राखेकाले सिधा हवाइ उडानमा प्राविधिक समस्या परेको बताएउनुभयो ।

कार्यक्रममा बीएनसीसीका संस्थापक सदस्य महन्त श्रेष्ठ, अनररी अध्यक्ष आदम गिलक्रिष्ट, व्यवसायी राज पाण्डे, अन्जनी फुँयाल, बासु लामिछाने लगायतले विभिन्न जिज्ञासा राख्नुभएको थियो ।