बेलायतमा मृत्यु भएका नेपालीको नाममा फेक एकाउन्टबाट सहयोग संकलन, बन्द गर्न ‘गो फन्डमी’मा रिपोर्ट

लन्डन । बेलायतको राजधानी लन्डनस्थित गत मंगलबार आफ्नै डेरामा मृत्यु भएका नेपाली विद्यार्थी योमन चन्दको नाममा फेक एकाउन्टबाट सहयोग संकलन सुरु गरिएपछि बन्द गर्न ‘गो फन्डमी’मा रिपोर्ट गरिएको छ ।

सोमबार (नोभेम्बर १७ तारिख) मध्य रातिदेखि सहयोग संकलन बन्द गरिने घोषणापछि सोमबार नै सुजन शाहको नाममा ‘फेक एकाउन्ट’ खोली सहयोग संकलन सुरु गरिएकाले समितिले गो फन्डमीमा जानकारी गराएको हो ।

स्वर्गीय चन्दका फुपूका छोरा (भाइ) सुजन शाहले आफ्नो नाममा फेक एकाउन्ट खोलेको थाहा पाउँदा आफू स्तब्ध भएको र उक्त एकाउन्ट बन्द गर्न ‘गो फन्डमी’ मा रिपोर्ट गरिसकेको बताउनुभयो । मंगलबार बिहानसम्म https://gofund.me/43bb4352f भन्ने एकाउन्टमा योमन चन्दका लागि ५५३ पाउन्ड जम्मा भएको देखिएको छ ।

‘https://gofund.me/43bb4352f भन्ने एकाउन्ट फेक हो । यसबारे हाम्रो समितिलाई कुनै जानकारी छैन र सहमति पनि छैन। त्यसैले उक्त एकाउन्टमा गएर सहयोग गर्नु भएका साथीहरुले गो फन्डमा गएर आफूले सहयोग गरेको रकम फिर्ता माग्न हामी अनुरोध गर्दछौं,’- समितिका सदस्य तथा एनआरएनए युके अध्यक्ष राजेन्द्र पुडासैनीले भन्नुभयो, ‘यसबारे हामीले प्रहरीसहित सम्बन्धित निकायलाई जानकारी गराइसकेका छौं ।’

सुजन शाह र एनआरएनए यूकेका अध्यक्ष पुडासैनीका अनुसार योमनको वास्तविक एकाउन्टमा भने १७ हजार ६३० पाउन्ड उठिसकेको छ । उदार मनले मानवीय अभियानमा सहयोग गर्ने बेलायतस्थित नेपाली समुदायप्रति शाहले आभार व्यक्त गर्नुभएको छ ।

एक वर्षअघिमात्र अध्ययनका लागि बेलायत आएका सल्यान दार्मा गाउँपालिका- ४ निवासी चन्दको गत मंगलबार बिहान निधन भएको थियो । शव नर्थविक पार्क हस्पिटलमा राखिएको र कोरोनर रिपोर्ट आएपछि उहाँका निकटस्थलाई हस्तान्तरण गरिने जनाइएको छ ।