११ राजदूत फिर्तासँगै परराष्ट्रकै कर्मचारीलाई तोकियो कार्यवाहक, बेलायतमा दुवाडी

लन्डन । बेलायतसहित ११ देशका नेपाली राजदूत फिर्तासँगै परराष्ट्रकै कर्मचारीलाई कार्यवाहक तोकिएको छ । ती कार्यवाहक राजदूतहरुले आ-आफ्नो जिम्मेवारी सम्हालिसकेका छन् ।

बेलायतको कार्यवाहकमा उपनियोग प्रमुख विपिन दुवाडी तोकिनुभएको छ । दुवाडीले यसअघि पनि सन् २०२४ सेप्टेम्बरदेखि २०२५ जनवरीसम्म कार्यवाहक राजदूतको भूमिका निर्वाह गरिसक्नुभएको छ ।

बेलायतका लागि नेपाली राजदूत चन्द्रकुमार घिमिरे सरकारले फिर्ता बोलाएसँगै मंगलबार साँझ स्वदेश प्रस्थान गर्नुभएको थियो । उहाँले नेपाल पुग्नुभएपछि राजीनामा समेत दिनुभएको परराष्ट्र स्रोतले जनाएको छ ।

यसैगरी अमेरिकाका लागि नेपाली कार्यवाहक राजदूतको जिम्मेवारी परराष्ट्र मन्त्रालयका सहसचिव शरदराज आरणले सम्हाल्नु हुनेछ भने चीनको कार्यवाहकमा सहसचिव रोशन खनाल रहनुभएको छ ।

जर्मनीको कार्यवाहकमा उपनियोग प्रमुख सागर फुयाल, जापानको कार्यवाहकमा उपनियोग प्रमुख हरिहरकान्त पौडेल, मलेसियाको कार्यवाहकमा उपनियोग प्रमुख मुदिता बज्राचार्य, कतारको कार्यवाहकमा उपनियोग प्रमुख कुमार राई रहनुभएको छ ।

साउदी अरेबियाको कार्यवाहकमा उपनियोग प्रमुख सिर्जना अधिकारी, स्पेनको कार्यवाहकमा उपनियोग प्रमुख पूरक अधिकारी, इजरायलको कार्यवाहकमा उपनियोग प्रमुख अधिकृत कुमारबहादुर श्रेष्ठ र रुसको कार्यवाहकमा सहचारी कसम पोखरेल रहेको परराष्ट्र मन्त्रालयले जनाएको छ ।