गाजा क्षेत्रमा पत्रकार मारिएको विरोधमा बेलायतमा पत्रकारको प्रदर्शन

लन्डन । इजरायलको गाजा क्षेत्रमा पत्रकारहरू मारिएको घटनाप्रति आपत्ति जनाउँदै बेलायतको अक्स्फोर्ड काउन्टी काउन्सिल नजिकै स्थानीय पत्रकारहरूले विरोध प्रदर्शन गरेका छन् ।

प्रदर्शनकारीहरूले पत्रकारिता स्वतन्त्रता र मानवीय सुरक्षाको पक्षमा आवाज उठाउँदै निर्दोष सञ्चारकर्मीहरूको हत्या रोक्न अन्तर्राष्ट्रिय समुदायलाई तत्काल हस्तक्षेप गर्न आग्रह गरेका छन् । उनीहरूले पत्रकारमाथि हुने आक्रमण प्रेस स्वतन्त्रतामाथिको ठूलो चुनौती भएको भन्दै न्यायको माग पनि गरेका छन् ।

प्लेकार्ड, ब्यानर र झन्डासहित चार दर्जन हाराहारीमा पत्रकार प्रदर्शनमा उत्रिएका थिए ।

दुई साताअघि इजरायलको हवाई आक्रमणमा परी गाजामा अल जजिराका फोटो पत्रकार मोहम्मद सलामा, रोयटर्सका फोटो पत्रकार हुसेम अल–मस्री, द इन्डिपेन्डेन्ट अरबी र एपीमा काम गर्दै आएकी पत्रकार मरियम अबु दग्गातथा पत्रकार मोज अबु ताहा मारिएका थिए ।