बेलायतमा १६औं नेपाली मेलाको रौनक

पासा पुचः गुथि यूकेले जित्यो एम्बासडर कप

लन्डन । बेलायतस्थित केम्पटन पार्क रेस कोर्समा आइतबार भव्य रुपमा नेपाली मेला सम्पन्न भएको छ । तमुधिं यूकेको आयोजना र नेपाली दूतावास लन्डनको सहकार्यमा नेपाली मेला सम्पन्न भएको हो ।

मेलामा बेलायतका ४४ नेपाली संघसंस्थाले सांस्कृतिक झाँकी तथा नृत्य प्रस्तुत गरेका थिए । झाँकीमा नेपालका विभिन्न जातजातीको परम्परागत भेषभूषा, नाचगान र संस्कृतिको झल्को देखिएको थियो । करिब १३ हजार दर्शक सहभागी रहेको मेलामा ७५ वटा स्टलमार्फत नेपाली खाना, च्यारिटी र व्यापारिक सामग्रीको बिक्री गरिएको थियो ।

मेलामा पासा पुचः गुथि यूकेले झाँकी र नृत्य दुवैमा उत्कृष्ट प्रस्तुति दिँदै एम्बासडर कप जित्यो । उसले ११ सय पाउन्ड पुरस्कार जित्यो । मगर संघ यूके र किरात याक्थुङ चुम्लुङ यूके पनि पुरस्कार विजेतामा परे ।

उत्कृष्ट सांस्कृतिक नृत्य प्रतियोगितामा ४० जना डान्सरहरुको घिन्ताङ घिसी (लट्ठी जुधाएर गरिने नाच)बाट पासा पुचः गुथि यूके प्रथम भयो भने तनहुँ समाज यूके दोस्रो र किरात याक्थुङ चुम्लुङ यूके तृतीय भए ।

मेलाको अवसरमा तमुधीं यूकेले नेपाल विद्युत् प्राधिकरणका पूर्वकार्यकारी निर्देशक कुलमान घिसिङ, गण्डकी प्रदेश सांसद बेदप्रसाद गुरुङ, खेलाडीहरु सरिना रानी घले र संगम गुरुङ, कोरियोग्राफर कविता घर्तीमगर गुरुङ, नेपाली लिंक (नवीन पोखरेल, ध्रुव राज अर्याल, नरेन्द्र बस्नेत), गोर्खा मिडिया मिलन तमु र प्रकाश गुरुङलाई खादा, फेटा र प्रमाणपत्रले सम्मान गरेको थियो ।

कार्यक्रमका प्रमुख अतिथि बेलायतका लागि नेपाली राजदूत चन्द्रकुमार घिमिरेले सन् २००९ देखि सुरु मेलाले नेपालीको मन, मुटु र नेपालको सांस्कृतिक विविधता यूके ल्याएको उल्लेख गर्नुभयो ।

उज्यालो नेपाल अभियानका अभियन्ता कुलमान घिसिङले नेपाली मेलाले राष्ट्रिय गान ‘सयौं थुंगा फूलका हामी एउटै माला नेपाली’को भावनालाई प्रतिनिधित्व गरेको बताउनुभयो ।

तमुधिं यूके अध्यक्ष जुमकाजी गुरुङले नेपाली मेलाको १६औं संस्करणलाई ऐतिहासिक रुपमा सम्पन्न गर्न सहयोग पुर्‍याउने सबैप्रति आभार प्रकट गर्नुभयो ।

मेला संयोजक तमुधिं यूके उपाध्यक्ष कमल गुरुङले स्वागत मन्तव्य दिँदै सहयोगी सबैलाई धन्यवाद दिनुभयो । उहाँले नेपाली मेलामार्फत विदेशमा हुर्किएको नेपालीको नयाँ पुस्ता र विदेशी समुदायमाझ समेत नेपाली कला, संस्कृति प्रवर्द्धनको लक्ष्य राखिएको बताउनुभयो ।

अध्यक्ष जुमकाजी गुरुङको अध्यक्षतामा भएको कार्यक्रमको औपचारिक सत्र महासचिव डा विशाल गुरुङले सञ्चालन गर्नुभएको थियो । सांस्कृतिक कार्यक्रम सूर्य गुरुङ, दुर्गा गुरुङ, योगेश गुरुङ लगायतले सञ्चालन गर्नुभएको थियो ।