काठमाडौंमा सुरु भयो एनआरएनएको एकता महाधिवेशन

गैरआवासीय नेपालीहरूलाई एकजुट भई अगाडि बढ्न परराष्ट्रमन्त्री राणाको आग्रह

काठमाडौं । सर्वोच्च अदालतको परमादेशबाट पुन:स्थापित भएको उच्चस्तरीय समितिको आयोजनामा गैरआवासीय नेपाली संघ (एनआरएनए) को एकता महाधिवेशन काठमाडौंमा शनिबारदेखि सुरु भएको छ ।

महाधिवेशन परराष्ट्रमन्त्री आरजु राणा देउवाले उद्घाटन गर्नुभएको हो । महाधिवेशनमा संस्थापक अध्यक्ष उपेन्द्र महतो, बद्री केसी नेतृत्वको कार्यसमितिको सहभागिता छैन । महाधिवेशनमा प्रवासमा रहेको गैरआवासीय नेपाली संघ राष्ट्रिय समन्वय समितिका प्रतिनिधि सहभागी छन् । उच्चस्तरीय समितिका अनुसार २६ सय प्रतिनिधि दर्ता भएको जनाएको छ । यस महाधिवेशनले नयाँ नेतृत्व चयन गर्नेछ ।

महाधिवेशनको उद्घाटन सत्रमा सम्बोधन गर्नुहुँदै परराष्ट्रमन्त्री डा आरजु राणा देउवाले गैरआवासीय नेपालीहरूलाई एकजुट भई अगाडि बढ्न आग्रह गर्नुभएको छ । उहाँले संस्थाभित्र राजनीति नगरी एकताबद्ध भई अगाडि बढ्न आग्रह गर्नुभयो ।

उहाँले एनआरएनको उद्देश्य पूरा गर्नका लागि एकबद्ध भई सक्रियतापूर्वक लाग्न र त्यसका लागि आफू र परराष्ट्र मन्त्रालयले आवश्यक सहजीकरण गर्ने प्रतिबद्धता व्यक्त गर्नुभयो । उहाँले पछिल्लो समय एनआरएनएमा विवाद देखिएको र उक्त विवाद समाधानका लागि सर्वोच्च अदालतको आदेशानुसार भइरहेको एकता महाधिवेशनलाई सफल पार्न भूमिका खेल्ने सबै धन्यवादको पात्र भएको उल्लेख गर्नुभयो ।

परराष्ट्रमन्त्री डा राणाले विदेशमा रहेर नेपालप्रति देखाएको भावना आफूले बुझेको उल्लेख गर्दै विश्वमा नेपाली संस्कृति, खाना र पहिचानलाई फैलाउन निर्वाह गरेको भूमिका सराहनीय भएको बताउनुभयो ।