भारतमा रेल दुर्घटनामा ७ नेपालीसहित १३ जनाको ज्यान गयो

काठमाडौं । भारतमा रेल दुर्घटनामा परी ७ नेपालीसहित १३ जनाको ज्यान गएको छ ।

बुधबार महाराष्ट्रको जलगाउँ जिल्लाको पारधाडे तालुका पाचोरामा भएको दुर्घटनामा ४ जना अछामका, एक जना कैलाली र दुई जना कोशी प्रदेशका रहेका नेपालीको मृत्यु भएको हो । मृत्यु हुनेमा अछामको पंचदेवल विनायक नगपालिका – ४ का नन्दाराम विक , उहाँकी श्रीमती मैसरा विक, छोरा हिमु विक ,कलबजार नगरपालिका –४ चाल्साकी ६० वर्षीया जयकला कामी रहनुभएको छ ।

त्यसैगरी कैलालीको मोहन्याल गाउँपालिका –६ सोल्टाकी ४३ वर्षीया कमला भण्डारी, नेपालको ठेगाना नखुलेकका राधेश्याम भाइ र लच्छिराम कन्नु पासवान रहेको भारतीय सञ्चारमाध्यमले जनाएका छन् ।

नेपालका हृयुजला सावन्त, धर्मबहादुर सावन्त र दिपक थापाको विघ्नहर्ता अस्पताल पाचोरामा उपचार भइरहेको छ ।महाराष्ट्र राज्यस्थित जलगाउँमा बुधबार साँझ लखनउबाट मुम्बई जाँदै गरेको पुष्पक एक्सप्रेसमा आगो लागेपछि यात्रु रेलबाट हाम फालेका थिए ।

रेलवे अधिकारीका अनुसार पुष्पक एक्सप्रेसमा सवार यात्रुले रेलको पांग्राबाट धूवाँ निस्किएपछि सम्भावित आगलागीको डरले लिकमै हाम फालेका थिए ।

त्यस क्रममा विपरीत दिशाबाट तीव्र गतिमा आइरहेको कर्नाटक एक्सप्रेसको रेलले उनीहरूमध्ये धेरैलाई किचेको थियो ।