ब्रिटिस गोर्खा, ब्रिटेनबाट नेपाल हवाई उडानलगायत विषय उठाउँछु : सांसद डा. कोइराला

लन्डन । नेपाली कांग्रेसका नेता एवं प्रतिनिधिसभा सांसद डा. शेखर कोइरालाले ब्रिटिस गोर्खा, ब्रिटेनबाट नेपाल हवाई उडानलगायत विषय बेलायत सरकारका मन्त्री र सांसदहरुसँग उठाउने बताउनुभएको छ ।

नेपाली दूतावास लण्डनमा शुक्रबार उहाँकै स्वागतका लागि आयोजित कार्यक्रममा सम्बोधन गर्नुहुँदै सांसद कोइरालाले उक्त धारणा राख्नुभएको हो । ‘समान काम, समान पेन्सन ब्रिटिस गोर्खाहरुको माग छ । यो स्वाभाविक हो । ब्रिटिस मित्रहरुसँग कुरा हुँदा यो विषय उठाउँछु,’ उहाँले थप्नुभयो, ‘इयूले कालोसूचीमा राखेकाले नेपालबाट जहाज यूरोपमा आउन पाको छैन । ब्रिटेनमा त आउने कुरै भएन । त्यसैले नेपालबाट यहाँ जहाज आउन समय लाग्ला । तर ब्रिटेनबाट सुरुमा हप्तामा १ दिन वा २ दिन नेपालमा जहाज पठाउन सकिन्छ कि भन्ने कुरा पनि म ब्रिटिस मित्रहरुसँग राख्छु ।’

उहाँले गैर आवासीय नेपाली नागरिकता वितरण गरिए पनि कार्यान्वयनमा समस्या आउनु गुड गभर्नेन्स नहुँदाको असर भएको बताउनुभयो । ‘नेपालमा समस्या भइरहेको डिसिजन गरिदिन्छ तर सेवाग्राहीले फाइदा लिन पाइरहेको हुँदैन । गुड गभर्नेन्स नहुँदा यस्तो भयो । यसबारे हामी चिन्तित छौं । जस्तो, एनआरएन नागरिकता दिइयो तर कार्यान्वयनमा समस्या भइरहेको छ,’ उहाँले भन्नुभयो ।

नेपाली राजनीतिबारे यहाँका नेपाली समुदाय जानकार रहेको भन्नुहुँदै उहाँले संक्षिप्तमा टिप्पणी गर्नुभयो, ‘अहिले नेपालको राजनीति अत्यन्तै तरल छ ।’

बेलायतको एसिया मामला हेर्ने विदेश राज्यमन्त्री क्याथराइन वेष्ट र उद्योग व्यापार वाणिज्यमन्त्री ग्यारेथ थोमसको निमन्त्रणामा उहाँ बिहीबार बेलायत आउनुभएको हो । सांसद कोइरालाले यही जनवरी १३ मा संसद् भवनभित्र आयोजना गरिने एक विशेष कार्यक्रममा सम्बोधन गर्नुहुन्छ । त्यस्तै बेलायती राजनीतिज्ञहरुसँग भेटघाट साथै विभिन्न सहरमा नेपाली समुदाय र कांग्रेस कार्यकर्तासँग पनि अन्तरक्रिया गर्नुहुनेछ । उहाँ १६ तारिखमा नेपाल फर्कनुहुने कार्यक्रम छ ।

त्यसअघि कार्यक्रममा बोल्नुहुँदै नेपाली दूतावास लन्डनका उपनियोग प्रमुख विपिन दुवाडीले सांसद कोइरालाजस्तो प्रभावशाली व्यक्तित्वलाई दूतावासमा स्वागत गर्न पाउनु खुसीको कुरा भएको बताउनुभयो । उहाँले दूतावासको निमन्त्रणा स्वीकारेर आइदिएकोमा सांसद कोइरालालाई धन्यवाद र दूतावाससम्म ल्याउन पहल गर्ने नेपाली संघसंस्थाका अगुवाहरुलाई पनि धन्यवाद ज्ञापन गर्नुभयो ।

सम्बोधनका क्रममा दुवाडीले दूतावासले बेलायत सरकारले जारी गर्ने ई-भिसाबारे सचेतना, नेपाली संघसंस्थाको अद्यावधिक लिनेलगायत नियमित काम गरिरहेको जानकारी गराउनुभयो । उहाँले बेलायतमा रहेका नेपाली समुदायले मातृभूमिमा गरिरहेको योगदानको प्रशंसा गर्नुहुँदै अझै थप र प्रभावकारी काम गर्नका लागि दूतावासको भूमिका आवश्यक परेमा सहजीकरण गर्न तयार रहेको बताउनुभयो ।

समारोहमा एनआरएनए अभियन्ता, बेलायतस्थित नेपाली समुदायका अगुवाहरु, समाजसेवी, बुद्धिजीवी, पत्रकार, दूतावासका कर्मचारी लगायतको उपस्थिति थियो ।