नर्वेमा नेपाली स्रष्टा पुरस्कृत

काठमाडौं । युवा नेपाली सर्जक प्रकाश आङ्देम्बे नर्वेको एक प्रतिष्ठित पुरस्कारबाट पुरस्कृत हुनुभएको छ ।

शरणार्थी तथा आप्रवासीहरुसम्बन्धी कार्यरत संस्था “लोपे”का लागि नर्वेको समावेशिकरण तथा विविधता निर्देशनालय (आईएमडीआई)ले आङ्देम्बेलगायत अन्य चार जनालाई त्यहाँको प्रतिष्ठित पुरस्कार “मङ्गफोल्ड पुरस्कार” २०२४ प्रदान गरेको हो । आईएमडीआईका वरिष्ठ सल्लाहकार क्विन ससिना वाकु जोरामोले आङ्देम्बेलगायतलाई पुरस्कृत गरेकी थिइन् । कार्यक्रममा सियन नगरपालिकाका मेयरलगायत विभिन्न प्रतिष्ठीत ब्यक्तित्त्वहरुको उपस्थिति रहेको थियो ।

पुरस्कार पाउनेहरुमा उहाँलगायत पेरी इल्का टिकम्यान, एलेना मन्डिका र एमी अन्वेन हुनुहुन्छ । यो पुरस्कार हरेक वर्ष समावेशीकरण र विविधता प्रवर्द्धन गर्ने संस्था तथा ब्यक्तिलाई प्रदान गरिन्छ ।
पुरस्कार पाउने संस्था लोपे नर्वेको सियान सहरमा क्रियाशील रहँदै आएको छ । यो संस्थाले मानव मर्यादा, परोपकार, लोकतन्त्र र समानताका मूल्यहरुलाई प्रवर्द्धनको क्षेत्रमा काम गर्छ ।
नेपालमा रहँदा नाटक, कथा तथा कविता लेखनमा सक्रिय आङ्देम्बे हालः परिवारसहित नर्वेमा बसोबास गर्नुहुन्छ । उहाँ चलचित्र निर्देशकका रुपमा पनि परिचित हुनुहुन्छ । त्यहाँ उहाँ फिल्म, भाषा, साहित्य तथा फोटोग्राफी क्षेत्रमा सक्रिय रहँदै आउनुभएको छ । निकट भविष्यमै उहाँको एक वृत्तचित्र प्रदर्शनमा आउन लागेको छ भने नर्वेजियन भाषामा लेखिएको कविता सङ्ग्रह पनि प्रकाशोन्मुख छ ।
पुरस्कार पाएपछि उहाँले आफू उत्साहित भएको बताउनुभयो ।