बेलायतका लागि नेपाली राजदूत घिमिरेसँग गोर्खा सैनिकको विषयमा सभापति राईको छलफल

लन्डन । बेलायतका लागि नेपाली नवनियुक्त राजदूत चन्द्र घिमिरेसँग गोर्खा भूतपूर्व सैनिक संघ (गेसो) का सभापति कृष्णकुमार राईले छलफल गर्नुभएको छ ।

बिहीबार १२ डिसेम्बर (२०८१ मंसिर २६ गते) ललितपुरमा राजदूत घिमिरेलाई भेटेको गेसो सभापति राईले बताउनुभयो । उहाँले भेटमा विशेष गरेर अहिले गोर्खाहरुको समस्या समाधानार्थ नेपाल र बेलायत दुई सरकारबीच भइरहेको वार्ताबारे कुराकानी भएको जानकारी दिनुभयो । भेटवार्ता पछि राईले भन्नुभयो – ‘विशेष गरेर अहिले गोर्खाहरुको समस्या समाधानार्थ नेपाल र बेलायत दुई सरकारबीच भइरहेको वार्ताबारे महामहिमज्यूलाई संक्षिप्त रुपमा जानकारी गराउनको साथै टेकनिकल विषयहरुमा समेत स्पष्ट बनाउने अवसर पाइयो । यसमा महामहिमज्यूलाई धन्यवाद दिन चाहन्छौं ।’

यसपछि राजदूत घिमिरेले आफ्नो तर्फबाट कुरा राख्ने क्रममा आफै पनि गोर्खा सैनिककै सन्तान भएकोले समस्या समधान गर्न पहिलो काम हुने प्रतिबद्धता जनाउनुभएको थियो । त्यसमा गोर्खाहरुको साथ चाहिने राजदूत घिमिरेको भनाइ रहेको उहाँले बताउनुभयो । राजदूत घिमिरेको भनाइ उद्धृत् गर्दै सभापति राईले भन्नुभयो, ‘तपाईंहरु सबै संस्था र भूतपूर्व सैनिकहरूको एकता चाहिन्छ । यो हुन सकेन भने विषय अघि बढाउन समस्या हुनेछ भन्ने कुरा राख्नु भयो ।’

‘हामी वार्तामा अघि बढ्ने धरातल भनेको ३५ बॅुदे नै हो । यो ३५ बॅुदे सरकारको क्याबिनेटमा समेत छलफल भएर तयार भएको जवाफ हो । तसर्थ अब अघि बढ्ने भनेको ३५ बॅुदेको जगमा बसेर हो । तपाईंहरु द्विविधामा नपर्नु होला भन्नेसमेत भेटमा हामीलाई आश्वस्त बनाउनुभएको कुरा सबैमा खुशीका साथ भन्न चाहन्छु,’ सभापति राईले सामाजिक सञ्जालमा लेख्नुभएको छ ।

राजदूत घिमिरेलाई यही मंसिर २ गते राष्ट्रपति रामचन्द्र पौडेलले नियुक्त गर्नुभएको हो । त्यसअघि मन्त्रिपरिषद्को सिफारिस भएपछि संसदीय सुनुवाइ विशेष समितिले अनुमोदन गरेको थियो । राजदूत घिमिरे राष्ट्रपतिबाट पद तथा गोपनियताको शपथग्रहणपछि बेलायत आउने तयारीमा हुनुहुन्छ ।