बेलायतमा मनाइयो ‘रेमेम्बरेन्स डे’ [तस्बिरहरु]

लन्डन । बेलायतमा ९ नोभेम्बर २०२४ मा ‘रेमेम्बरेन्स डे’ मनाइएको छ । हरेक वर्षजस्तै अल्डरसटको प्रिन्सेस् गार्डेनमा ग्रेटर रसमूर नेपाली कम्युनिटी (जीआरएनसी) को आयोजनामा शनिबार ‘रेमेम्बरेन्स डे’ मनाइएको हो ।

कार्यक्रममा बुद्धिस्ट कम्युनिटी सेन्टर (बीसीसी) यूके र शिव कल्चर एन्ड कम्युनिटी सेन्टरबाट आउनुभएका धर्मगुरुद्वय मन्त्र वाचन गर्नुभएको थियो । कार्यक्रमका अवसरमा पूर्वगोर्खाहरुको सक्रियतामा निर्मित पहिलो भिक्टोरिया क्रस (भीसी) कुलवीर थापाको स्मारकमा पालैपालो रिथ अर्पण गरिएको थियो ।

रिथ चढाउनेहरुमा रसमूरका मेयर मारा मकुनुरा, सांसद एलेक्स बेकर, अल्डरसटका ग्यारिजन कमान्डर, जीआरएनसीका अध्यक्ष मान गुरुङ, क्यूओजीएलआरका गोर्खा मेजर भिम श्रीस मगर र अन्य संघसंस्थाका दर्जनभन्दा बढी व्यक्ति थिए ।कार्यक्रमका सहसंयोजक क्या. राजेन्द्रमान गुरुङको पहलमा द ओल्ड बेसीङ रोएल ब्रिटिस लिजन ब्यान्ड, बिकुलर र स्टायन्डर ब्यरियरको उपस्थिति र प्रस्तुति रौनक देखिएको थियो ।

संयोजक मेजर खेम गौचनको पहलमा क्यूओजीएलआरका ४५ जना जवानहरुको सहभागी र मार्चपास उत्तम देखिएको थियो । उक्त समूहमा कमान्डर, गोर्खा मेजर र आरएसएम लगायतको सहभागी रहेको थियो । कार्यक्रममा जीआरएनसी, गोर्खा मेमोरियल प्रोजेक्ट टिम, एनआरएनए यूके, शिव कल्चर एन्ड कम्युनिटी सेन्टरलगायत संस्थाहरुको पनि सहभागिता थियो । कार्यक्रममा सांसद, नेता, मेयर, काउन्सिलर, भूपू ब्रिटिस गोर्खाहरु, वहालवाला सेनाहरु, सर्वसाधारण करिब २ सय जना सहभागी थिए । ‘रेमेम्बरेन्स डे’ पहिलो र दोस्रो विश्वयुद्धमा शहादत प्राप्त सम्पूर्ण अग्रजहरुको सम्झनामा मनाइने गरिन्छ ।

संयोजक तथा उपाध्यक्ष उत्तरबहादुर गुरुङ र मेजर खिम गौचनले कार्यक्रम संचालन गर्नुभएको थियो ।