ए-स्टार नेपलिज बास्केटबलको फाइनलमा डीबीएस हेज र ग्रीनफोर्ड नाइट्स भिड्दै

लण्डन । बेलायतको नेपाली समुदायमा तीन वर्षदेखि हुँदै गरेको ए-स्टार नेपलिज बास्केटबल लिगको फाइनलमा डीबीएस हेज र ग्रीनफोर्ड नाइट्स भिड्ने भएका छन् ।

यही जुन २२ तारिखका दिन ब्रुनेल युनिभर्सिटी स्पोर्ट्स सेन्टर लण्डनमा दुई टीमबीच फाइनल खेल हुनेछ ।

जनवरीबाट शुरु भएको लिगमा ११ वटा टीमले भाग लिएको आयोजक नेपलिज बास्केटबल एसोसिएसन युकेका अध्यक्ष रूपक गुरुङले जानकारी दिए । ११ वटा टीमबाट शुरुको चरणमा लिग खेलाइएको थियो जसबाट छानिएका आठ वटा टीमका बीचमा नकआउट खेल भएपछि यी दुई टीम फाइनलमा पुगेका हुन् । विजेता टोलीले रनिङ शिल्ड र खेलाडीहरूले ट्रफी पाउने छन् ।

फाइनल खेल हुने दिनमा दुई वटा महिला बास्केटबल टीम र पूर्व खेलाडीहरूको दुई वटा टीमको अप्रतियोगी म्याच पनि खेलाइने अध्यक्ष गुरुङले जानकारी दिए । पूर्व खेलाडीहरुको टीममा हेज नेपाली र गोर्खा कन्सट्रक्सन रहेका छन् ।

यसबाहेक सो दिन १२ जना बास्केटबलका खेलाडीहरूबीच तीन प्वाइन्टको व्यक्तिगत प्रतिस्पर्धा पनि हुनेछ र विजेताहरूलाई अवार्ड दिइनेछ ।

करिब ३०० बढी दर्शकका माझ हुने फाइनल खेलको दिनमा गीत र नृत्य पनि देखाइनेछ भने नेपालका बास्केटबलका पूर्व राष्ट्रिय खेलाडीहरूलाई सम्मान पनि गरिने अध्यक्ष गुरुङले बताए । सो समारोहमा नेपाली दुताबास लण्डनका प्रतिनिधि, स्थानीय काउन्सिलरहरू, एनआरएनए युकेका अध्यक्ष प्रेम गाहा, पर्वतारोही कृष्ण थापा, नेपाली समुदायका अगुवाहरू लगायतका अतिथिहरू रहनेछन् ।

बेलायतमा हुर्कँदै गरेका नेपाली युवाहरूको ध्यान कुलतमा जानुभन्दा खेलकुदमा जाओस् र उनीहरूमा सकारात्मक उर्जा प्राप्त होस् भनेर यो प्रतियोगिता आयोजना गरेको अध्यक्ष गुरुङ बताउँछन् ।

खेलको टाइटल एस्टार फाइनान्सियल सोल्यूसन्सले स्पोन्सर गरेको छ ।