बेलायतमा अप्रिलदेखि बिजुली र ग्याँसको भाउ घट्ने

लण्डन । कोभिड र युक्रेन युद्धपछि बेलायतमा आकाशिएको घरायसी काममा खपत हुने उर्जाको मूल्यमा अप्रिलदेखि केही गिरावट आउने भएको छ ।
बेलायतको उर्जासम्बन्धी नियामक निकाय अफजेमले अप्रिल १ देखि हरेक घरले तिर्ने उर्जावापतको शुल्कमा मासिक करिब २० पाउण्ड कम्ती हुने बताएको छ ।
अफजेमले अहिले वार्षिक १ हजार ९२८ उर्जाको मूल्य तोकेकोमा अब त्यसमा १२ प्रतिशतले घटाई १ हजार ६९० पाउण्ड बनाएको छ ।
पेट्रोलियम पदार्थको थोक मूल्यमा आएको कमी र जाडो याममा उर्जाको खपत धेरै नभएका कारण मूल्य कम गरिएको बताइएको छ । यद्यपि बेलायतमा उर्जा संकट आउनु अघिको मूल्य भन्दा करिब दोब्बर मूल्य उपभोक्ताले तिरिरहनु परेको छ ।
उर्जाको मूल्य अझै कम हुनसक्ने भए पनि अफजेमले उर्जा प्रदायक कम्पनीहरुको बक्यौता धेरै भएकाले त्यसलाई परिपूर्ति गर्न केही बढी मूल्य कायम गरेको जनाएको छ । जसवापत उर्जा कम्पनीहरुले बजार मूल्यभन्दा करिब मासिक साढे २ पाउण्ड बढी उपभोक्ताबाट उठाउने छन् । बेलायतमा उर्जा संकटसँगै दर्जनौँ उर्जा प्रदायक कम्पनी बन्द भएका थिए ।