लण्डन । बेलायत सरकारको आप्रवासीप्रति कडा नीतिका वावजुद गत वर्ष आप्रवासीको संख्या उच्च रहेको पाइएको छ ।
बेलायतको राष्ट्रिय तथ्याङ्क कार्यालय (अफिस फर न्यानशल स्ट्याटिटिक्स) का अनुसार गत वर्ष ६ लाख ६ हजार मानिस बेलायत आएका छन् ।
जसमा युक्रेनबाट आउनेको संख्या १ लाख १४ हजार रहेको छ भने हङकङबाट आउनेको संख्या ५२ हजार रहेको बताइएको छ ।
युरोपियन युनियनभित्रका देशका नागरिकहरू बेलायत आउनेभन्दा बेलायतबाट फर्किनेहरूको संख्या ठूलो छ भने युरोपियन मुलुकबाहिरबाट बेलायत आउनेको संख्या भने बढ्दो छ ।
सोही अवधिमा ३७ हजार ९४८ मानिसहरूलाई बेलायतबाट डिपोट गरिएको छ ।
सन २०१० मा कन्जरभेटिभ नेतृत्वको सरकार आएपछि आप्रवासीको संख्या कटौतीलाई मुख्य अजेण्डा बनाएको थियो तर त्यसयता हरेक वर्ष सरकारको अपेक्षाभन्दा धेरै मानिसहरू बेलायत आइरहेका छन् ।
वर्तमान प्रधानमन्त्री ऋषि सुनकले आफ्ना पाँच प्राथमिकतामा आप्रवासीको संख्या घटाउने पनि राखेका छन् ।
