बेलायतमा जुलाईदेखि ग्याँस र बिजुलीको मूल्य घट्ने

लण्डन । बेलायतमा गत वर्ष आकाशिएको ग्याँस र बिजुलीको मूल्य अन्तत घट्ने भएको छ ।

बेलायतको उर्जासम्बन्धी नियामक निकाय अफजेमले विहीबार गरेको घोषणा अनुसार जुलाईदेखि सामान्य घरायसी प्रयोगको ग्याँस तथा बिजुलीको मूल्य वार्षकि २ हजार ७४ पाउण्डरहेको छ ।

तीन महिनाअघि सो मूल्य ३ हजार २८० पाउण्ड तोकिएको थियो तर त्यसमा सरकारले हस्तक्षेप गरी २ हजार ५०० पाउण्ड कायम गरेको थियो ।

नयाँ मूल्यअनुसार उपभोक्ताहरूले प्रतिमहिना गत वर्षको दाँजोमा ४२६ पाउण्ड कम तिर्नेछन् ।

अफजेमले तय गरेको मूल्य उर्जा उपलब्ध गराउने कम्पनीहरूले ग्राहकहरूलाई लगाउन सक्ने अधिकतम मूल्य हो । अफजेमले प्रतिकिलोवाट प्रतिघण्टा बिजुलीका लागि ३० पेन्स र प्रतिकिलोवाट प्रतिघण्टा ग्याँसका लागि ८ पेन्स मूल्य तोकेको छ । यसअघि सो दर क्रमश ५१ पेन्स र १३ पेन्स रहेको थियो ।

नयाँ मूल्यले उपभोक्तालाई केही राहत दिए पनि सन् २०२१ को तुलनामा अझै उर्जाको मूल्य ६० प्रतिशत उच्च रहेको छ ।

रसियाले युक्रेनमाथि आक्रमण गरेपछि उर्जाको मूल्यमा ज्यामितीय वृद्धि भएको थियो । अहिले उर्जाको होलसेल मूल्यमा कटौती भएपछि अफजेमले नयाँ मूल्य सार्वजनिक गरेको हो ।

अफजेमले सन् २०१८ देखि उर्जाको मूल्य तोक्ने गरेको छ र हरेक तीन/ तीन महिनामा थोक मूल्यमा आउने उतारचढाव हेरी मूल्य निर्धारण गर्ने गरेको छ । गत वर्ष उर्जाको मूल्य उच्च हुँदा अफजेमले उपभोक्ताको पक्षमा निर्णय नगरेको आरोप पनि लागेको थियो ।

बेलायत सरकारले उर्जाको मूल्य उच्च भएपछि गत वर्षको अक्टोबरबाट राज्यकोषबाट सहुलियत उपलब्ध गराउँदै आएको छ । जसबाट सरकारलाई २९.४ बिलियन पाउण्ड भार परेको बताएको छ ।