लन्डन । बेलायतको प्रहरीले प्रधानमन्त्री ऋषि सुनकलाई गुडिरहेको कारमा सिट बेल्ट नलगाएकोमा जरिवाना गरेको छ ।
ट्राफिक नियमको उल्लङ्घन गरेको भन्दै प्रधानमन्त्री सुनकको नाम नलिई ल्यान्काशायर प्रहरीले लन्डनका ४२ वर्षीय पुरुषलाई जरिवाना गरेको बताएको छ ।
“ल्यान्काशायरमा गुडिरहेको कारमा यात्रुले सिट बेल्ट नलगाएका लन्डनका ४२ वर्षीय व्यक्तिलाई जरिवाना गरेका छौँ“ ल्यान्काशायर प्रहरीले ट्वीट गरेको छ । उक्त जरिवाना सूचना अनुसार कारबाहीमा परेका व्यक्तिले २८ दिनभित्र सम्बन्धित निकायमा सो जरिवाना तिरिसक्नुपर्नेछ ।
प्रधानमन्त्री सुनकलाई ५० पाउण्ड जरिवाना गरिएको बताइएको छ ।
सामान्यतया सिट बेल्ट नलगाएका यात्रुलाई १०० पाउन्डसम्म जरिवाना गर्न सकिने कानून छ । यदि सो विषय सम्बन्धित मुद्दा अदालतसम्म पुगेमा त्यो जरिबाना बढेर बढेर ५०० पाउन्डसम्म पुग्न सक्छ ।
जरिवानाको घोषणा लगत्तै प्रधानमन्त्रीको कार्यालयले विज्ञप्ति जारी गर्दै भनेको छ – “प्रधानमन्त्रीले यो गल्तीलाई पूर्ण रूपमा स्वीकार गरेको र माफी समेत माग्नु भएको छ र आगामी दिनमा नियम पूर्णरूपमा पालना गर्नुहुनेछ ।“
बेलायतमा यसअघि कोभिडको नियम उल्लंघन गरेकोमा तत्कालिन प्रधानमन्त्री बोरिस जोन्सनलाई पनि जरिवाना गरिएको थियो । त्यतिबेला अर्थमन्त्री रहेका सुनक समेत जरिवानामा परेका थिए ।
विधिको शासन बलियो मानिएको बेलायतमा शक्तिमा रहेका मानिसहरुलाई पनि प्रहरीले कानुनको पालना गराउन धक मान्दैनन् भन्ने यो उदाहरण हो ।
