लण्डन । गोरखा भूतपूर्व सैनिक संघ (गेसो) ले गोरखा भूतपूर्व सैनिकहरूको संयुक्त संयन्त्र जी-१० भित्र विश्वासको वातावरण बनाइ राख्न आवश्यक भएको बताएको छ ।
सो संयन्त्रका सदस्य समेत रहेका गेसो सभापति कृष्णकुमार राईले आज एक विज्ञप्ति जारी गर्दै नोभेम्बर ३० मा बेलायत र नेपाल सरकारबीच गोरखा भूतपूर्व सैनिकका समस्याका बारेमा प्राविधिक स्तरमा भएको वार्ता गोरखाहरूको सरोकारको विषयमा बेलायती पक्षलाई आश्वस्त तुल्याएकोमा नेपाल सरकारका प्रतिनिधहरू र गोरखा दुतहरूलाई धन्यवाद व्यक्त गरेका छन् ।
उनले वार्तालाई सफल पार्न नेपाल सरकार र गोरखा संस्थाहरू जी-१० का प्रतिनिधिहरूबीच घनीभूत छलफल गरेर एउटै आवाजमा प्रस्तुत हुनुपर्नेमा जोड दिएका छन् । वार्ताबाट समाधान निस्कनेमा आफूहरू आशावादी रहेको भन्दै उनले सम्पूर्ण भूतपूर्व सैनिकहरूबीच एकता र सहकार्यको आवश्यकता औँल्याएका छन् ।
