विश्व जलवायु शिखर सम्मेलन इजिप्टमा सुरु

इजिप्ट । कार्बन उत्सर्जन कटौती गर्ने प्रयासमा पछि नहट्ने प्रतिवद्धतासहित संयुक्त राष्ट्रसङ्घको जलवायु शिखर (कोप–२७)सम्मेलन इजिप्टमा आइतबारदेखि शुरु भएको छ ।
बितेका केही महिनामा जलवायु परिवर्तनका कारण सिर्जित विपत्तिले विश्वभरि हजारौंको ज्यान लिइसकेको छ, लाखौं विस्थापित भएका छन् र अर्बौंको क्षति भएको छ । पाकिस्तान र नाइजेरियामा आएको भीषण बाढीले तहसनहस बनायो, अफ्रिका र पश्चिमी संयुक्त राज्य अमेरिकामा खडेरी बढ्यो, क्यारिबियन क्षेत्रमा चक्रवात फैलियो र तीन महादेशमा अत्यधिक गर्मी बढ्यो ।
रेड सीको किनारामा रहेको शर्म अल शेख रिसोर्टमा आयोजित सम्मेलन युक्रेनविरुद्ध रूसको युद्ध, ऊर्जा सङ्कट, बढ्दो मुद्रास्फीति र कोभिड महामारीको लामो समयसम्मको प्रभावले भरिएको एक सङ्कटपूर्ण वर्षमा हुन लागेको हो ।
तर संयुक्त राष्ट्रसङ्घका जलवायु परिवर्तनसम्बन्धी कार्यकारी सचिव सिमोन स्टिएलले सन् २०३० सम्ममा हरितगृह उत्सर्जन ४५ प्रतिशतले घटाउने र १९ औं शताब्दीको उत्तरार्धमा विश्वव्यापी तापक्रम वृद्धिलाई १.५ डिग्री सेल्सियसमा सीमित गर्ने लक्ष्यमा आफू ‘पछि नहट्ने’ बताउनुभएको छ । १३ दिने शिखर सम्मेलन सुरु हुनासाथ स्टिलले भन्नुभयो, “हामी मानिसहरूलाई जवाफदेही बनाउनेछौं, चाहे उनीहरु राष्ट्रपति, प्रधानमन्त्री, कार्यकारी प्रमुख नै किन नहोउन् ।”
उहाँले भन्नुभयो, “कार्यान्वयनको केन्द्रबिन्दु भनेको जलवायु सङ्कटलाई सम्बोधन गर्न हरेक दिन विश्वका सबै ठाउँबाट सबैले सक्दो प्रयास गरिरहेका छन् ।”
यस दशकको अन्त्यसम्ममा कार्बन प्रदुषण १० प्रतिशतले बढ्ने र पृथ्वीको सतह २.८ डिग्री सेल्सियससम्म बढ्ने अनुमान गरिएको छ ।
सन् २०१५ को पेरिस सम्झौताअन्तर्गत गरिएका वाचाहरू पूरा गरिएमा तापक्रमको दश भागको केही भाग मात्र कटौति हुनेछन् ।
इजिप्टलाई अध्यक्षता हस्तान्तरण गर्दै कोप २६ का अध्यक्ष तथा बेलायती अधिकारी आलोक शर्माले भन्नुभयो, “मैले बुझेको छु कि विश्वभरका नेताहरूले यस वर्ष प्रतिस्पर्धात्मक प्राथमिकताहरूको सामना गरेका छन्, हामी स्पष्ट हुनुपर्छ । हाम्रो वर्तमान क्षण जति चुनौतीपूर्ण छ, निष्क्रियता अदूरदर्शी छ र यसले जलवायु विपत्तिलाई मात्र रोक्न सक्छ ।”
उहाँले भन्नुभयो, “विश्व समुदाय र नेताहरूलाई जागरूक पार्न वास्तवमा कति आह्वान आवश्यक छ ?”
संयुक्त राष्ट्रसङ्घको विश्व मौसम विज्ञान सङ्गठन (डब्लुएमओ) ले चेतावनी जारी गर्दै विगत आठ वर्ष समुद्रको सतह बढेको, हिउँ पग्लने र तातो हावाका कारण अहिलेसम्मकै सबैभन्दा बढी गर्मी हुने समय बनेको जनाएको छ ।
संयुक्त राष्ट्रसंघका प्रमुख एन्टोनियो गुटेर्रेसले जारी गरेको विज्ञप्तिमा भनिएको छ, “ हाम्रो ग्रहले सङ्कटको सङ्केत दिइरहेको समयमा कोप–२७ सुरु भएको छ ।” उहाँले सबैले आ–आफ्नो स्थानबाट जलवायु समस्यासँग जुझ्न पहल गर्नुपर्नेमा जोड दिनुभयो ।