हङकङ । सोमबार (अक्टोबर २६) देखि हङकङ जाँदा होटल क्वारेन्टाइनमा बस्नु नपर्ने भएको छ ।
हङकङका सरकारी अधिकारीहरुले शुक्रबार यसको घोषणा गरेका हुन् ।
यसैगरी हङकङ आउनेहरुले विमान चढ्नुअघि कोभिड नभएको प्रमाणित पनि गर्नु नपर्ने भएको छ । तर हङकङमा आउने बित्तिकै कोभिड परीक्षण गरिने छ तर यात्रुहरुले त्यो परीक्षणको परिणाम कुरिरहनु पर्ने छैन । शुरुको तीन दिन भने उनीहरुले आफ्नो निवासमै बस्नुपर्ने छ । होटल रेष्टुराँमा खान जान पाउने छैनन् ।
यसअघि तीन दिन होटलमा र चारदिन घरमा आइसोलेसनमा बस्न पर्ने बाध्यात्मक व्यवस्था रहेको थियो ।
शुक्रबारको सरकारी घोषणासँगै हङकङमा करिब साढे दुई वर्ष लामो होटल क्वारेन्टाइनको झन्झटको अन्त्य भएको छ भने मानिसहरुले यात्राका लागि हवाइ टिकट बुक गर्न थालेका छन् । बीबीसीका अनुसार यात्रुहरुको बढ्दो मागलाई हेरेर हङकङको राष्ट्रिय विमान सेवा क्याथे प्यासिफिकले अक्टोवरका लागि २०० भन्दा बढी उडान थपेको छ ।
हङकङमा कोभिड फैलिन नदिन विश्वकै सबैभन्दा कठोर नीति लिइएको थियो । जसका कारण हङकङको अर्थतन्त्रमा गम्भीर असर परेको बताइएको छ ।
