लण्डन । गोरखा भूतपूर्व सैनिक संघ (गेसो) को चौथो महाधिवेसन अक्टोबर ८ तारिखका दिन बेलायतमा हुने भएको छ ।
यसअघि सेप्टेम्बर १९ मा हुने तय भएको महाधिवेसन बेलायती महारानीको अन्त्येष्ठी सोही दिने हुने भएपछि सार्नुपरेको सभापति कृष्णकुमार राईले जानकारी दिए ।
महाधिवेसन बेलायतको अल्डरसटस्थित एम्पायर हलमा हुनेछ ।
महाधिवेसन पूर्व बेलायतमा रहेका विभिन्न शाखाहरुको अधिवेसन अहिले धमाधम सम्पन्न भइरहेको पनि राईले जानकारी दिनुभयो । उनका अनुसार प्लमस्टिड, अल्डरसट र बेजिङस्टोक शाखाको अधिवेसन सम्पन्न भइसकेको छ भने बाँकी शाखाहरुको पनि अधिवेसन तय भइसकेको छ ।
महाधिवेसन अघि नै सबै शाखाहरुको अधिवेसन सकिने पनि उहाँले जानकारी दिनुभयो ।
गोरखा भूतपूर्व सैनिकहरुको हक अधिकारका लागि विसं २०४७ मा स्थापना भएको भए पनि गेसो अधिवेसनहरु भने नियमित छैन । पछिल्लोपटक तेस्रो अधिवेसन सन् २०१६ सेप्टेम्बर १९ मा बेलायतमा भएको थियो । जसबाट पहिलोपटक संस्थापक सभापति पदमबहादुर गुरुङबाट उपसभापति कृष्णकुमार राईमा नेतृत्व हस्तान्तरण भएको थियो ।
सभापति राईले गत वर्षको सेप्टेम्बरमै आफ्नो कार्यकाल पूरा भएको भएपनि कोरोना महामारीका कारण एक वर्ष कार्यकाल थपिएको बताए ।
