उपनिर्वाचनमा हार पछि कञ्जरभेटिभ पार्टीका अध्यक्षद्वारा राजिनामा

लण्डन । बेलायतको तल्लो सदन हाउस अफ कमन्सका लागि विहीबार भएको उपनिर्वाचनमा पराजय भोगेपछि बेलायतको सत्तारुढ कञ्जरभेटिभ पार्टीका अध्यक्ष ओलिभर डाउडेनले राजिनामा दिएका छन् ।
विहीबार दुई निर्वाचन क्षेत्रमा उपनिर्वाचन भएको थियो । जसमा दुवै क्षेत्रमा कञ्जरभेटिभले हार बेहोरेको थियो । उपनिर्वाचन अघि दुुवै क्षेत्रमा कञ्जरभेटिभ पार्टीले जितेको थियो ।
दुवै क्षेत्रका पूर्व निर्वाचित सांसदहरु यौनसम्बन्धी विषयमा तानिएका थिए । त्यसपछि उनीहरुले राजिनामा दिएका थिए ।
अहिले दुईमध्ये एक क्षेत्रमा लेबर र अर्को क्षेत्रमा लिबरल डेमोक्र्याटले जितेको छ ।
हारपछि शुक्रबार बिहानै कञ्जरभेटिभ पार्टीका अध्यक्ष डाउडेनले पार्टीका नेता प्रधानमन्त्री बोरिस जोन्सनलाई सम्बोधन गर्दै राजिनामा दिएका छन् । उनले यो उपनिर्वाचनमा पार्टी सबैभन्दा कमजोर तबरले लडेको भन्दै यसको कसै न कसैले जिम्मेवारी लिनुपर्ने बताएका छन् ।
पार्टीका नेता तथा प्रधानमन्त्री बोरिस जोन्सन भने अहिले रुवाण्डामा छन् । उनीमाथि पनि राजिनामा दिन पार्टीभित्रैबाट दबाब बढिरहेको छ ।