बेलायतमा अनसनरत गोरखाहरुप्रति ऐक्यवद्धता जनाउन नेपालमा पनि गोरखाहरु अनसन बस्दै

लण्डन । गोरखाहरुको समस्या समाधानका लागि नेपाल तथा बेलायत सरकारबीच तत्काल वार्ताको माग राखी बेलायतमा अनसनरत गोरखा सैनिकहरुप्रति ऐक्यवद्धता जनाउन नेपालमा पनि अनसन शुरु हुने भएको छ ।

नेपालमा बसोबासरत गोरखा सैनिकहरु, सिंगापुर प्रहरी र नागरिक समाजको सहभागितामा आइतबारदेखि रिले अनसन शुरु हुने बताइएको छ ।

सो अनसन दिन र रात गरी चौबीसै घण्टा चल्ने बताइएको छ ।

गोरखा सत्याग्रह संयुक्त संघर्ष समिति नेपालको आयोजनामा हुने सो अनसन वरिष्ठ अधिवक्ता प्राध्यापक युवराज संग्रौलाले शुरु गर्ने बताइएको छ । उनी गोरखाहरुको समस्याका बारेमा जानकार व्यक्ति हुन् । यसअघि गोरखा भूतपूर्व सैनिक संघ (गेसो) का कानुनी सल्लाहकार रहिसकेका संग्रौला नेपाल सरकारका पूर्व कानुनी सल्लाहकार महान्यायाधिवक्ता पनि हुन् ।

सो अनसनमा भाग लिन दिन र रातका लागि आठ/आठ जनाको समूह बनाइएको छ । जसमा पूर्व गोरखाका साथै उनका परिवार पनि छन् । हालसम्म तीन दर्जनले सो अनसनमा भाग लिनका लागि नाम लेखाइसकेका छन् भने अनसन बस्न नाम लेखाउने स्वयंसेवी गोरखा र उनीहरुको परिवारको नाम थपिँदो छ ।

बेलायतमा गोरखाहरुले रिले अनसनपश्चात आमरण अनसन बसिरहेका छन् । ज्ञानराज राई, धनबहादुर गुरुङ र पुष्पा राना घले एक सातादेखि बेलायती प्रधानमन्त्रीको कार्यालय टेन डाउनिङ स्ट्रिट अघि आमरण अनसनरत छन् ।