मेघान-ह्यारीको आरोप परिवारले ‘गोप्य रूपमा’ सम्बोधन गर्ने : बकिंघम दरबार

अन्तर्वार्तामा डचेस अफ ससेक्स मेगनले लगाएको सबैभन्दा ठूलो आक्षेपमा आफूहरूको जन्मिने बच्चा कति अश्वेत होला भन्ने कुराकानी शाही परिवारभित्र धेरै पटक भएको भन्ने छ । तर, अन्तर्वार्ताका क्रममा भने दुवैले राजपरिवारका कुन सदस्यले त्यस्तो अभिव्यक्ति दिएका थिए भन्ने खुलाएनन् । ३९ वर्षीय मेघनकी आमा अश्वेत हुन् । उनले ब्रिटिस राजपरिवारभित्रको जीवन आफ्ना लागि धेरै कठिन भएको र कहिलेकाहीं बाँच्ने इच्छा नै मरेको बताएकी बीबीसीले उल्लेख गरेको छ । अन्तर्वार्ताका क्रममा उनले मानसिक समस्या भोग्दा सहयोगका लागि कहाँ सम्पर्क गर्ने भन्नेबारे अन्योलमा परेको समेत बताइन् ।

दरबारद्वारा जारी गरिएको विज्ञप्तिमा भनिएको छ, ‘पछिल्ला केही वर्ष ह्‍यारी र मेघनका लागि चुनौतीपूर्ण रहेको थाहा पाउँदा पूरै शाही परिवार निकै दु:खी छ ।’ वक्तव्यमा भनिएको छ, ‘दुवैले उठाएको विषय विशेषगरी रंगभेदसँग जोडिएको विषय निकै चिन्ताजनक छ । हुन सक्छ मानिसहरुले यसलाई अलगअलग तरिकाले सम्झिएका होलान् । हामीले यसलाई गम्भीरतापूर्वक रुपमा लिएका छौं । शाही परिवारले यसलाई निजी रुपमा सम्बोधनको प्रयास गर्नेछ ।’

बकिंघम दरबारले शाही परिवारका सदस्य ह्यारी, मेघन र उनीहरुका छोरा आर्चीलाई धेरै माया गर्ने बताएको छ । आर्चीको छालाको रंगलाई लिएर दरबारमा टिप्पणी गरिएको आरोप लगाए पनि ह्यारीले यसमा महारानी एलिजाबेथ र राजकुमार फिलिपले नगरेको बताएका थिए ।