सर्वोच्च अदालतले संसद पुनर्स्थापना गर्नेमा प्रचण्ड विश्वस्त

लण्डन । नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले सर्वोच्च अदालतले संसद पुनर्स्थापना गर्नेमा आफूहरु विश्वस्त रहेको बताएका छन् ।

सो पार्टीको प्रवास समन्वय कमिटीको संयोजन र प्रवासी नेपाली एकता मंचले आयोजना गरेको भर्चुअल कार्यक्रममा बोल्दै उनले पहिले केपी ओलीले सबैतिर सेटिङ गरेको जस्तो देखिए पनि संसद विघटनदेखि हालसम्म आइपुग्दा त्यस्तो सेटिङ भत्किएको बताए । अस्थिरता कसैको चाहना नभएकाे सन्दर्भ कोट्याउँदै उनले संसद पुनर्स्थापना हुनबाट कसैले रोक्न नसक्ने दाबी गरे ।

निर्वाचन आयोगले पनि चुनाव चिन्ह र आधिकारिकता आफूहरुलाई नै दिने पनि उनले बताए । सर्वोच्च अदालत, निर्वाचन आयोगबाट आफूले चाहेजस्तो निर्णय नआउने संकेत पाएर नै केपी ओलीले विराटनगरको सभामा सर्वोच्च अदालतलाई धम्क्याएको उनको भनाइ थियो ।

नेकपाको एकता विचार, विधि र विधान तय गरेरै भएको बताउँदै उनले केपी ओलीलाई विधिविधान उल्लंघन गर्दा नियन्त्रण गर्न नसक्नुमा आफूहरु पनि जिम्मेवार रहेको उनले स्वीकार गरे । ‘हामी पनि चोखो छौँ भनेर भन्दैनौँ तर पार्टी विभाजनको मुख्य जिम्मेवार हामी हाेइनौँ’ उनले भने ।

प्रवासी नेपालीहरुको नागरिकताका बारेमा बोल्दै उनले संविधानमा उल्लिखित गैरआवासीय नेपालीलाई नागरिकताको प्रबन्धलाई प्रभावकारी कार्यान्वयनमा आफूहरुले जोड दिने वचन दिए ।

गोरखाहरुको समान अधिकारको पक्षमा आफूहरु रहेको उल्लेख गर्दै उनले गोरखाहरुको आन्दोलनमा समर्थन र सहयोग रहने प्रतिवद्धता व्यक्त गरे । गोरखाहरुले संसद विघटनको असंवैधानिक कदमका विरुद्ध बोल्ने साहस गरेकोमा आफूलाई खुशी लागेको बताउँदै उनले गोरखाहरुको समस्यालाई टुंगोमा पुर्याउन आफूहरुको निरन्तर सहयोग रहने आश्वासन दिए ।

कार्यक्रमका अर्का वक्ता पार्टीका स्थायी कमिटीका सदस्य घनश्याम भुसाल अहिलेको अवस्था करिब करिब राजा ज्ञानेन्द्रले सत्ता लिएको अवस्था सरह भएको बताए । ओलीको असंवैधानिक कदमका विरुद्ध चाँडै हस्तक्षेप गर्न नसके मुलुक डरलाग्दो द्वन्द्वमा पर्न सक्ने खतरा उनले ओैंल्याए ।

नेकपामा विधि विधान भित्र बसेर निर्णय गरे पनि पार्टीको नेतृत्वकर्ता ओलीले विधि विधान नमान्दा देश दुर्घटनातर्फ अघि बढेको उनको भनाइ थियो । राष्ट्र राम्रो हुन पार्टीहरु राम्रो हुनुपर्नेमा धारणा राख्दै उनले केपीलाई सुधार गर्न नसकिएको स्वीकार गरे । अराजनीतिक भीड जम्मा गरेर ओलीले राजनीतिलाई अस्तव्यस्त ठाउँमा पुर्याएको उनको आरोप थियो ।

संसद पुनर्स्थापना हुनेमा आफूहरु ढुक्क भएको बताउँदै ओलीको कदमलाई अदालतले सदर गरे पनि घोषित मितिमा निर्वाचन हुन नसक्ने उनको विश्लेषण थियो। अदालतले ओलीको कदमलाई साथ दिए जनता आन्दोलित हुने र त्यही आन्दोलनले केपी र विद्यालाई हटाउने उनले संखघोष गरे । यदि ओली पक्षमा भएका दोस्रो पुस्ताले नेतृत्वलाई हस्तक्षेप गरे दुवै पार्टी एक हुनसक्ने संभावना अझै रहेको भूषालको निस्कर्ष थियो ।

नेकपा प्रवास समन्वय कमिटीका संयोजक युवराज चौलागाइँको अध्यक्षतामा भएको कार्यक्रममा कमिटीका सचिव श्रीप्रसाद साहले स्वागत भाषण दिएका थिए । प्रवासी नेपाली एकता मंच युकेका अध्यक्ष राजेन्द्र पुडासैनीले सन्चालन गरेको कार्यक्रममा प्रवास कमिटीका सहइन्चार्ज लक्ष्मण पन्त,  ओमानका डिबी क्षेत्री र जापान हर्क थापाले पनि बोलेका थिए ।

प्रतिक्रिया

सम्बन्धित सामाग्री