फ्रान्सका राष्ट्रपति म्याक्रोनलाई कोरोना संक्रमण

लण्डन । फ्रान्सका राष्ट्रपति इम्यानुयल म्याक्रोनलाई कोरोना संक्रमण भएको छ ।

उनमा कोभिड १९ को लक्षणहरु देखिएपछि टेष्ट गराउँदा पोजिटिभ देखिएको उनको कार्यालय इलिजी प्यालेसले बिहीबार बिहान जनाएको छ ।

उनी सातदिनसम्म सेल्फ आइसोलेसनमा बस्नेछन् ।

उनले आफ्नो कार्यभार कसैलाई हस्तान्तरण गरेका छैनन् ।

म्याक्रोनसित सम्पर्कमा आएका युरोपियन युनियनका प्रमुख चार्ल्स मिसेल र स्पेनका प्रधानमन्त्री पेड्रो सान्द्वेज पनि सेल्फ आइसोलेसनमा बसेका छन् । यस्तै उनीसित सम्पर्क भएका फ्रान्सका प्रधानमन्त्री, सभामुख तथा म्याक्रोनकी श्रीमती पनि सेल्फ आइसोलेसनमा बसेका छन् ।

म्याक्रोन कोरोना भाइरसबाट संक्रमित हुने राष्ट्रप्रमुखहरुको सूचीमा परेका छन् । यसअघि अमेरिकी राष्ट्रपति डोनाल्ड ट्रम्प, बेलायती प्रधानमन्त्री बोरिस जोन्सन लगायतलाई कोरोना संक्रमण भइसकेको छ ।