आइतबार, असोज ४ २०७७ | Sun, September 20, 2020
नेपालको समय: १८:५७ | UK Time: 14:12

 जापानको नयाँ प्रधानमन्त्रीमा सुगा

वीनेपाली
२०७७ भदौ ३१ गते ९:५४

टोकियो । जापानको सत्तारुढ दल लिबरल डेमोक्रयाटिक पार्टीका प्रमुख योशिहिदे सुगा प्रधानमन्त्रीमा निर्वाचित हुनुभएको छ ।
जापानको संसदमा बुधबार भएको निर्वाचनमा उहाँ अत्यधिक मतका साथ प्रधानमन्त्रीमा निर्वाचित हुनुभएको हो । जापानको संसदमा अहिले सुगाले नेतृत्व गरेको पार्टीको बहुमत रहेकाले पनि उहाँले संसदमा भएको निर्वाचनमा अत्यधिक मत पाउनु भएको हो ।
किसानको छोरा सुगा अहिले ७१ बर्षको हुनुभएको छ । उहाँ सन् १९९१ मा प्रधानमन्त्री बन्नु भएका किचि मियाजावापछि सवैभन्दा पाको उमेरको प्रधानमन्त्री हुनु भएको छ ।
प्रधानमन्त्रीका रुपमा निर्वाचित भएपछि उहाँले देश र जनताको लागि काम गर्न आफु सँधै प्रतिबद्ध रहेको बताउनुभएको छ । “मेरो लगाव सवै देश र जनताका लागि हुनेछ, म त्यसैका लागि काम गर्नेछु,” उहाँले भन्नुभयो ।
उहाँले आफुले सवैभन्दा बढी प्राथमिकता कोरोनाविरुद्धको लडाईमा दिने र जापानी अर्थतन्त्रलाई पुरानै अवस्थामा फर्काउने बताउनु भएको छ । त्यसका लागि सवैको तर्फबाट सहयोग प्राप्त हुने विश्वास पनि उहाँले व्यक्त गर्नुभयो ।
उहाँको मन्त्रीपरिषद्मा पूर्व अर्थ मन्त्री तारो असो र विदेश मन्त्री तोशिमित्सु मोतेगी दोहोरिने संभावना देखिएको छ ।
सुगाले यसअघि लिएको मन्त्रीपरिषद्को मुख्य सचिवको जिम्मेबारी भने तत्कालिन स्वास्थ्य मन्त्री कत्सुनोबु कातोले पाउने अपेक्षा गरिएको छ ।
निवर्तमान प्रधानमन्त्री सिन्जो आबेको अति निकटस्थ पात्रका रुपमा रहनु भएका सुगालाई यसअघि गत सोमबार उहाँ पार्टीको प्रमुखमा निर्वाचित गराइएको थियो ।
सुगाले आबे नेतृत्वको सरकार रहेका बेलामा सरकारको मुख्य प्रवक्ता र मन्त्रीपरिषद्को मुख्य सचिवका रुपमा जिम्मेबारी निर्वाह गर्नुभएको थियो ।
गत सोमबार भएको पार्टी भित्रको निर्वाचनमा उहाँले ३७७ मत प्राप्त गर्नुभएको थियो । उहाँसँग प्रतिश्पर्धा गर्नुभएका पूर्व विदेश मन्त्री फुमिओ किशिदाले ८९ र पूर्व रक्षा मन्त्री शिगेरु इशिबाले ६८ मत मात्रै प्राप्त गर्नुभएको थियो ।
निवर्तमान प्रधानमन्त्री आबेले केहीदिन अगाडि अस्वस्थताको कारण देखाउदै प्रधानमन्त्री पद त्यागको घोषणा गर्नुभएको थियो ।
उहाँ शुरुमा सन् २००६ देखि २००७ सम्म पहिलो पटक प्रधानमन्त्री हुनुभएको थियो । त्यतिबेला पनि अस्वस्थतालाई कारण देखाउदै पद त्याग गर्नुभएका आबे स्वास्थ्यमा सुधार आएपछि सन् २०१२ मा फेरी प्रधानमन्त्रीमा निर्वाचत हुनुभएको थियो । त्यसपछि केही दिन अगाडिसम्म उहाँ लगातार प्रधानमन्त्री हुनु भएको थियो ।
जापानमा सवैभन्दा लामो समयसम्म प्रधानमन्त्री बनेको नेताका रुपमा रहनु भएका ६५ बर्षिय आवेले आफ्नो कार्यकाल अझै झण्डै एक बर्ष बाँकी रहेकै बेलामा राजीनामा दिनुभएको हो । उहाँले सरकारको नेतृत्व गरेका बेलामा सुगाले अति निकट भएर उहाँसँग काम गर्नुभएको थियो ।
जापानमा अहिलेपनि आबेलाई अति लोकप्रिय नेताका रुपमा लिइने र पार्टी भित्र पनि उहाँको प्रभाव अत्यधिक धेरै भएको छ ।

प्रतिक्रिया

सम्बन्धित सामाग्री

फेसबुक