लण्डन । गैरआवासीय नेपाली संघ (एनआरएनए)का महासचिव हेमराज शर्माले राजनीतिक दलका भातृसंगठनका कार्यसमितिमा रहेकालाई आफ्नो संस्था वा एनआरएनए मध्ये एक रोज्न “उर्दी” जारी गरे । कार्यसमितिमा काम गरिरहेका नेपालका राजनीतिक दलका विदेशस्थित भातृ संस्थाहरुमा कार्यसमितिमा रहेकालाई २५ फ्रेवुअरी २०२० सम्ममा राजीनामा नदिए कारवाही गर्ने ‘धम्की’ दिए । शर्माको चेतावनी सामुन्ने टिक्न नसक्नेहरुले भटाभट राजीनामा पत्र लेखी एनआरएनएमा पठाए । केहीले संघका अध्यक्ष कुमार पन्त तथा आ-आफ्ना निकट पदाधिकारीहरुलाई सम्पर्क गरी के गर्ने भन्दै जिज्ञासा राखे । प्रायः सबैले ‘अहिलेलाई राजीनामा पत्र पठाई रहनु’ भन्ने अमूर्त जवाफ पाएपछि डराउने मध्येका अधिकांशले गुपचुप रुपमै राजीनामा पत्र बुझाए ।
राजनीति दलका भातृ संघ संगठनमा सकृयहरुले एनआरएनएबाट राजीनामा नदिने हुन् कि भन्ने आंशकाले महासचिव शर्माले राजीनामा नदिए कारवाही गर्न बाध्य हुने सन्देस बारम्बार प्रवाह गरी रहे । उनका समर्थकले संसारभर हल्ला गरे – राजनीति मुक्त एनआरएनए । लामो समयसम्म एनआरएनएमा विधान समितिमा बसेका शर्मा अक्टोबर २०१९ मा महासचिव निर्वाचित भएपछि संघमा आफ्नो कार्यकारी भूमिका देखाउन कडा रुपमा प्रस्तुत भए ।
कार्यकारी पदमा पहिलो पटक आएका शर्माका बारेमा थाहा नपाउनेहरु अलि डराए । उनको कारवाही चेतावनीपछि दलहरुका भातृसंस्थाहरुमा र एनआरएनमा दुवैतर्फ पद होल्ड गरेकामध्ये लगभग सबैले २५ फ्रेवुअरीभित्र संघमा राजीनामा बुझाएको दावी शर्माले सामाजिक संजालमा गरे । एनआरएनएमा महत्वपूर्ण पदमा रहेर पार्टीमा राजीनामा बुझाउनेमा कुन-कुन मुलुकका छन् भन्ने बारेमा जिज्ञासा राख्दा उनले गोपनियताका कारण देखाउदै सार्वजनिक गर्न मानेनन् । “हामीले राजनीतिक दल वा एनआएनए पदाधिकारी मध्ये एक रोज्न भनेका थियौ,” उनले उत्साहित हुँदै भने, “प्रायः सबै साथीहरुले एनआरएनलाई राजनीति मुक्त गराउन सहयोग गर्नु भएको छ ।”
राजनीति दलका भातृ संगठनहरुमा बस्ने र एनआरएनए जिम्मेवारी लिँदै दोहोरो भूमिका निर्वाह गर्नेहरु निस्कृय रहे । प्रायः सबैलाई लाग्यो साँच्चै एनआरएनए राजनीति दलको प्रभावमुक्त हुन लागेको हो त ? यही आशंका बीचमा शर्माको दाबी चार महिना मै झुठो सावित भयो । गत जुन २० शुक्रबार नेपाली जनसम्पर्क समितिका अध्यक्षहरुले १४ औं महाधिवेशनमा प्रवासबाट प्रतिनिधित्वका सुनिश्चितता गर्न ज्ञापन पत्र बुझाएपछि शर्माको दावी ‘हावादारी’ सावित भयो ।
शर्माको दावीलाई आधारहीन बनाउनेमा काँग्रेस निकट नेपाली जनसम्पर्क समितिहरु पहिलो पंक्तिमा उभिए । जनसम्पर्क समितिहरु बेल्जियम, अमेरिका, क्यानाडा, अस्ट्रेलिया र बेलायतलगायतले माउ पार्टी काग्रेसको १४ औं महाधिवेशन प्रतिनिधि बन्न काँग्रेस सभापति शेरवहादुर देउवा समक्ष ज्ञापन पत्र बुझाए । ज्ञापन पत्र बुझाउनेमा शर्मासँगै कार्यसमितिमा काम गरिरहेका यूरोप क्षेत्रका संयोजक नारायण आचार्य (नेदरल्याण्ड), उपसंयोजक शुक्रराज न्यौपाने (आयरल्याण्ड) जनसम्पर्क समिति अमेरिकाका प्रमोद सिटौला (आइसिसि सदस्य) छन् र जनसम्पर्क समिति अमेरिकाका उपाध्यक्ष सीपी पौडेल (एनआरएनए अमेरिकाका केन्द्रीय सदस्य) छन् । जनसम्पर्क समितिहरुका अध्यक्षहरुको अगुवाईमा हस्ताक्षरसहित कांग्रेस सभापति शेरवहादुर देउवालाई बुझाइएको ज्ञापन पत्र उनीहरुमध्ये धेरैले सामाजिक संजालमा सगौरव शेयर गरे ।नेकपा निकट प्रवासी नेपाली एकता मंचका नेताहरुले अहिलेसम्म औपचारिक रुपमा एनआरएनएसँग र पार्टीसँगको दोहोरो सम्बन्ध सार्वजनिक गरेका छैनन् ।
दैनिक सामाजिक संजालमा संघका निर्णय सार्वजनिक गर्ने र फेसवुक लाइभमा रमाउने शर्मालाई त्यो थाहा नहुने कुरै भएन । तर पनि शर्मा यसबारेमा मौन छन् । शर्माले यो समाचार तयार हुँदासम्म न कारवाही पत्र थमाएका छन् न त प्रक्रिया नै अघि बढाएका छन् । शर्माका कार्यशैली हेर्दा राजनीति मुक्त एनआरएनए रमिता जस्तै बन्दै गएको छ । किनकि राजनीतिक संस्थाहरुकै महत्वपूर्ण पदमा कार्यकाल सकिएपछि एनआरएनएमा प्रवेश गरेका सयौँ व्यक्तिहरु एनआरएनए अभियन्ताको परिचय बोकेर समाजमा चिनिएका छन् । जसका मुख्य कार्यथलो नै राजनीतिक दलका भातृ संस्थाहरु हुन् ।
शर्मा आफै कांग्रेसको ‘कोटा’मा महासचिव
हुन त गत अक्टोबरको निर्वाचनमा संघ अध्यक्ष कुमार पन्त नेकपाका पार्टी कार्यकर्ताका रुपमा प्रस्तुत हुँदै मुख्य नेताहरुको दैनिक रुपमा घरदैलो गर्दा शर्मा पनि सँगै थिए । महासचिवमा शर्माले आफ्नो ‘पीएचडी डाक्टर’को सर्टिफिकेटले नपुगेर काँग्रेसको सदस्यता कम्युनिस्ट नेताहरुलाई देखाएकै हुन् । त्यही काँग्रेस ‘कोटा’ले उनलाई यो महासचिव पदमा आसिन हुन सजिलो बनाएको थियो ।
महासचिव निर्वाचित हुन प्रधानमन्त्री केपी ओली, पूर्वप्रधानमन्त्रीद्धय माधव नेपाल र पुष्पकमल दाहाल तथा उपनेता सुभाष नेम्वाङका घरका दैलोमा हाजिर लगाउन शर्मा स्वयं पुगेका थिए ।
एनआरएनए महासचिव भएपछि शर्माले पूर्वकार्यकारी अधिकृत हेमन्त दवाडीको राजीनामा गर्न लगाए भने अर्का कार्यकारी अधिकृत राजेश रानालाई स्पष्टीकरणको पत्र काट्न लगाए । शर्मालाई काँग्रेसका नेताहरुले कार्यकारी पदमै बसेर एनआरएनएमा काम गरेर ठाडो चुनौती दिएका छन् । यस्तो अवस्थामा शर्मा थाहा नपाएको झैँ नाटक गर्छन् कि पूर्वप्रतिवद्धता अनुसार कारवाही गर्न अघि बढ्छन त्यो थाहा पाउन भने केही समय कुर्नु पर्छ ।
