एनआरएनए एनसीसी अमेरिकाद्धारा सङ्कटमा परेका महिलाहरूका लागी हटलाइन सेवा सुरु

अमेरिका । गैरआवासीय नेपाली संघ (एनआरएनए) राष्ट्रिय समन्वय परिषद (एनसीसी) अमेरिकाले सङ्कटमा परेका अमेरिका बासी आम नेपाली महिलाहरूको लागी हटलाइन सेवा सुरु गरेको छ।
कुनै पनि आपतकालिन सेवा र परामर्श तथा घरेलु हिंसा एवम उद्दारका लागी अब २४ घण्टा नै खुल्ला रहने गरेर ८४४ ६७६ २८७२ टेलिफोन नम्बर बाट सेवा सुचारु गरेको हो। साथै निश्चित कानुनी उपचार, र तत्काल राहत एवम अन्य सेवाको लागी पीडितलाई सम्बन्धित निकाय सम्म पु¥याउने र केही निःशुल्क परामर्श र कानुनी प्रावधानका लागि पहल समेत गरिने जानकारी एनआरएनए एनसीसी अमेरिकाकी महिला सँयोजक दिक्षा बस्नेतले दिइन ।
फोन गर्ने प्रक्रियामा माथि उल्लेखित नम्बर डायल गरेपछि प्राप्त निर्देशनअनुसार महिलाका मुद्दा र परामर्शका लागी एक्सटेन्सन ७०० मा थिच्नु पर्ने हुन्छ। महिलाहरुको समस्या र समाधानका लागी संस्थाको तर्फबाट भरपुर पहल गर्ने प्रतिबद्धताका साथ यो सेवा सुरु गरिएको एनआरएनए एनसिसि युएसएले जनाएको छ। प्रवासमा कोही पनि नेपाली महिला अन्याय अत्याचार, दुरब्यबहार र हिंसाको शिकार नबनुन् भन्ने उद्देश्यले हेल्पडेस्क मार्फत विशेष पहल गर्दै समस्या समाधान गरिने छ।