रसमुरका नयाँ मेयरको पदबहाली नहुँदै कोरोनाबाट निधन

लण्डन । बेलायतमा नेपालीहरुको घना बसोबास रहेको रसमुर बोरो काउन्सिलका उपमेयर फ्रान्क रष्टको कोरोना भाइरसका कारण सोमबार निधन भएको छ ।

स्थानीय ग्रेटर रसमुर नेपलिज कम्युनिटीकी महासचिव प्रमिला राईले काउन्सिल लिडर डेभिड क्लिफोर्डलाई उद्धृत गर्दै रष्टको निधन कोरोना भाइरसका कारण सोमबार फ्रिम्ली पार्क अस्पतालमा भएको जानकारी दिनुभयो ।

२२ वर्षदेखि काउन्सिलर रहँदै आएका रष्ट आउँदो मे महिनाबाट मेयरको कार्यभार सम्हालेवाला थिए । उनी ८० वर्षका थिए ।

राईका अनुसार, रष्ट र उनकी श्रीमती दुवैलाई कोरोना संक्रमण भएपछि अस्पताल लगिएको थियो । उनकी श्रीमती भने कोरोनाबाट तङ्ग्रिएकी छिन् ।

रष्ट लेबोर पार्टीबाट निर्वाचित भएका थिए । नर्थ टाउन वडाबाट प्रतिनिधित्व गर्ने उनले यसअघि सन् २००३ मा पनि मेयर पद सम्हालेका थिए ।

डेनमार्क स्क्वाएर क्रेडिट स्कोर कम रहेका काउन्सिल स्टेटलाई पुनर्जीवन दिएको स्थानीयबासी विक्रम भट्टराई स्मरण गर्दछन् । उपमेयर रष्ट नेपालीहरुप्रति सकारात्मक रहने गरेको पनि उनी सम्झन्छन् ।