लण्डन । तमुधिँ एसोसिएसन युकेले हरेक वर्ष मे महिनाको अन्तिम आइतबार गर्दै आएको गोरखा कप यसवर्ष स्थगित भएको छ ।
संस्थाका अध्यक्ष नन्दजंग गुरूंगले कोरोना भाइरसबाट उत्पन्न विश्वव्यापी महामारीका कारण यस वर्षको गोरखा कप स्थगित गर्नुपरेको एक भिडियोमार्फत जानकारी दिएका छन् । उनले गोरखा कप स्थगित हुँदा पर्न गएको असुविधाप्रति क्षमायाचना गरेका छन् ।
तमुधिँ युकेका मिडिया सेक्रेटरी रोहित गुरुङले तमुधिँ युकेको २५ मार्चमा बसेको अनलाइन बैठकले सो प्रतियोगिता अर्को सूचना जारी नभएसम्मको लागि स्थगित गर्ने निर्णय गरेको जानकारी गराए ।
बेलायत सरकारले दुई जनाभन्दा बढी भेला हुन प्रतिबन्ध लगाएको र एक आपसमा कम्तीमा दुई मिटरको दुरी कायम गर्न निर्देशन दिएको उल्लेख गर्दै तमुधिँ युकेले बेलायत सरकारको निर्देशनको सम्मान गर्न र आफ्नो ख्याल गर्न सबैलाई अनुरोध गरेको छ ।
सेक्रेटरी गुरुङका अनुसार सन् २०२० को गोरखा कप कहिले गर्ने भन्ने बारेमा स्थिति सामान्य भएपछि निर्णय गरिने छ ।
तमुधिँ युकेले विगत १८ वर्षदेखि गोरखा कप आयोजना गर्ने गरेको छ । सो इभेन्ट युकेका नेपाली समुदायले गर्ने एक मुख्य इभेन्ट हो ।
यसैगरी तमुधिं युकेले कोरोना भाइरसबाट बच्न कुनै नेपालीलाई ‘आइसोलेसन’ मा बस्न समस्या भए तमुधिं भवन निःशुल्क प्रयोग गर्न दिने पनि निर्णय गरेको छ ।
कोरोना भाइरसका कारण जनजीवन अस्तब्यस्त बनेपछि नेपाली समुदायले गर्ने कार्यक्रमहरु एकपछि अर्को गर्दै स्थगित हुन थालेका छन् । मगर संघ युकेले हरेक वर्षको जुनमा नेपालबाट कलाकारहरु ल्याएर आयोजना गर्ने नेपलिज ओपन कन्सर्ट पनि यो वर्ष स्थगित भएको छ ।
संघका महासचिव रुद्र थापाका अनुसार, २४ मा बसेको अनलाइन बैठकले संघले आयोजना गर्ने नेपलिज ओपन कन्सर्ट स्थगित गर्ने निर्णय गरेको हो । मगर संघ युकेले विगत १४ वर्षदेखि नेपलिज ओपन कन्सर्ट गर्दै आएको छ ।
