लन्डन । ब्रिटिश आर्मीको रोयल गोर्खा राइफल्स्मा कार्यरत गोर्खाहरु लन्डनमा ४ हजार शैयाको अस्पताल निर्माणमा जुटेका छन् । ब्रिटेनको पहिलो एनएचएस नाइटिंगेल हस्पिटल निर्माणमा अन्य कामदारसंगै गोर्खाहरु खटिएका हुन् ।
नेपालमा महाभूकम्प जांदा पनि रोयल गोर्खा राइफल्स् स्कुल तथा सामुदायिक भवन निर्माणमा खटिएको थियो ।
आउंदो सातासम्म ५ सय शैया तयार भइसक्ने र यसलाई ४ हजार क्षमतासम्म बनाउने लक्ष्य छ ।
कोरोना भाइरस (कोभिड १९) संक्रमण तीव्र फैलिएपछि सरकारले पूर्वी लन्डनको एउटा विशाल प्रदर्शनी कक्ष एक्सेल सेन्टरलाई अस्पतालमा परिणत गर्न लागेको हो । ८७ हजार ३ सय २८ स्क्वायर मिटर स्पेश भएको एक्सेल सेन्टरमा जि २० सम्मेलन, विभिन्न प्रदर्शनी र लन्डन २०१२ ओलम्पिक्स भएका थिए ।
बेलायतमा शनिबारसम्म कोभिड १९ बाट मर्नेको संख्या १०१९ पुगेको छ । शुक्रबार यो संख्या ७५९ रहेकामा एकैदिन २६० जनाले ज्यान गुमाएका हुन् ।
प्रधानमन्त्री बोरिस जोन्सन, स्वास्थ्यमन्त्री म्याट हयानककसहित १७ हजार ८९ जनामा संक्रमण देखिएको छ । बेलायत सरकारका प्रमुख चिकित्सा अधिकृत प्राध्यापक क्रिस हवीटीमा समेत लक्षण देखा परेको समाचारमा उल्लेख छ ।
