नेपाली दूतावास लन्डनद्वारा नटिङहाममा पर्यटन प्रवर्धन


लन्डन । लन्डनस्थित नेपाली दूतावासले प्रजातन्त्र दिवसका अवसरमा सोमबार सांझ मिडल्याण्डस्थित नटिङहाममा पर्यटन प्रवर्धन विशेष कार्यक्रम गरेको छ । दूतावासले नटिङहाम नेपाली समाजको सहकार्यमा ‘नेपाल भ्रमण वर्ष २०२०’ लक्षित कार्यक्रम गरेको हो ।

समारोहलाई सम्बोधन गर्दै प्रमुख अतिथी नटिङहामकी लर्ड मेयर रोजमेरी हेलीले मिडल्याण्डमा दूतावासले पहिलोपटक यस खालको कार्यक्रम गर्दा बेलायत नेपाल र दुई देशका जनताबीच आपसी सम्बन्ध थप प्रगाढ बन्ने धारणा राखिन् । उनले ‘नेपाल भ्रमण वर्ष २०२०’ अभियानबाट उत्साहित हुंदै बेलायतवासीलाई पनि नेपाल भ्रमण गर्न आग्रह गरेकी थिइन् ।

समारोहमा राजदूत डा. दुर्गाबहादुर सुवेदीले ‘नेपाल भ्रमण वर्ष २०२०’ प्रवर्धन र नेपाल भ्रमणका लागि ब्रिटिश नागरिकहरुलाई अपिल गरे । राजदूत डा. सुवेदीले बेलायत नेपाल सम्बन्धका विविध आयाम र नेपालको प्राकृतिक सौन्दर्यबारे पनि बताएका थिए ।

सो अवसरमा दूतावासका उपनियोग प्रमुख शरदराज आरनले भ्रमण वर्ष अभियान र नेपालको प्राकृतिक तथा सांस्कृतिक विविधता झल्कने ‘प्रिजेन्टेसन’ दिए ।

कार्यक्रममा बर्मिङघमका कलाकारले नौमति बाजा र मिडल्याण्डका कलाकारले विभिन्न नेपाली मौलिकता झल्कने ६ वटा नृत्य प्रस्तुत गरे । अतिथीहरुमाझ नेपालको पर्यटन सम्बन्धि भिडियो पनि प्रस्तुत गरिएको थियो ।

कार्यक्रममा स्थानीय मेयर, काउन्सिलर, कुटनीतिज्ञ र नेपाली संघसंस्थाका प्रतिनिधि गरि तीन सय ५० व्यक्तिको उपस्थिति थियो । सो अवसरमा लर्ड मेयर रोजमेरी र राजदूत डा. सुवेदीले सहयोगी र कलाकारलाई सम्मान गरेका थिए ।

यसैबीच, दूतावास टोलीले अघिल्लो दिन घुम्ती सेवा समेत प्रदान गरेको छ । आइतबार बिदाको दिन भएपनि दूतावासका उपनियोग प्रमुख शरदराज आरन, तृतीय सचिव तेजेन्द्र रेग्मी र सहयोगी राजकुमार गिरीको टोलीले नेपाली राहदानी नवीकरण, भिजा, एनआरएन कार्ड लगायत सेवा प्रदान गरेको हो ।

प्रतिक्रिया

सम्बन्धित सामाग्री