नेपाली दूतावासमा दशैं समारोह

लन्डन –यहाँस्थित नेपाली दूतावासमा शनिवार दिउसो एक समारोहका बीच दशैं लगायत चाडहरुको अवसरमा एक स्वागत समारोह आयोजना गरियो ।

कार्यक्रममा सहभागीहरुलाई स्वागत गर्दै बेलायतका लागि नेपाली राजदूत डा दुर्गाबहादुर सुवेदीले दूतावासले राहदानी लगायतका सेवा आधा घण्टा भित्रै दिने व्यवस्था मिलाएको र घरघरमै भिसा उपलब्ध गराइरहेको जानकारी दिए । उनले निकट भविष्यमै दूतावासले बेल्फास्ट, स्विन्डन, डब्लिन, ग्लासगो लगायत शहरमा गएर नेपालीहरुका घरघर मै सेवा पुराउने लक्ष लिएको पनि बताए ।

उनले ‘नेपाल भ्रमण वर्ष २०२०’ को अवसरमा आउंदो वर्ष बेलायतबाट कम्तिमा एक लाख पर्यटक नेपाल पठाउने गरी काम भै रहेको जानकारी पनि गराए । राजदूत सुवेदीले दशैं, तिहार, म्ह पूजा, नेपाल संवत, छठ तथा ल्होसारको अवसरमा सबै नेपालीहरुलाई शुभकामना दिए ।

कार्यक्रमका प्रमुख अतिथि भूतपूर्व परराष्ट्र मन्त्री डा भेषबहादुर थापाले नेपालमा छोटो समयमा ठूल्ठूला राजनीतिक परिवर्तनहरु भएको तर त्यस अनुसार आर्थिक प्रगति हुन नसकेको बताए। ‘राजनीतिक काँचुली मात्रैले समृद्धि हुंदैन, आर्थिक र सामाजिक काँचुली फेर्न बांकी नै छ’-उनले भने ।

भारत तथा अमेरिकाका लागि नेपाली राजदूत रहिसकेका डा थापाले नेपालीहरुले संसार भरि गरेको प्रगतिबाट आफू अत्यन्त हर्षित भएको पनि बताए ।

कार्यक्रममा कोसेली संस्कृतिक परिवारले विभिन्न रोचक सांस्कृतिक कार्यक्रमहरु प्रस्तुत गरेको थियो ।

समारोहमा एनआरएन युकेकी नवनिर्वाचित अध्यक्ष पूनम गुरुङसहित कार्यसमितिका सदस्य, पदाधिकारी तथा आइसीसी सदस्यहरुलाई सम्मान गरिएको थियो ।

कार्यक्रममा बेलायतका विभिन्न शहरहरुबाट झन्डै ३०० को संख्यामा नेपाली तथा केही ब्रिटिश पाहुनाहरु पनि उपस्थित थिए । कार्यक्रममा दिवा भोजको पनि व्यवस्था गरिएको थियो ।

तस्बिर- शिव भण्डारी 

प्रतिक्रिया

सम्बन्धित सामाग्री