लन्डन मेलामा नेपाली दूतावासले बांड्यो नेपाल सामाग्री

लन्डन । लन्डन साउथहलमा शनिबार आयोजित एउटा वृहत मेला लन्डन मेलामा नेपाली दूतावास र समुदायले उत्साहजनक सहभागिता जनाएको छ । राजदूत डा. दुर्गाबहादुर सुवेदी, उपनियोग प्रमुख शरदराज आरणसहित दूतावास कर्मचारी र नेपाली समुदायले मेलामार्फत नेपाली कला-संस्कृति र पर्यटन प्रवर्धनमा पहल गरेका हुन् । नौमति बाजामा राजदूत आफैं नाचेर हौसला प्रदान गरेका थिए ।

मेलामा राखिएको दूतावासको स्टलमार्फत ‘नेपाल भ्रमण वर्ष २०२०’ को प्रचार प्रसार गरि आगन्तुकहरुलाई नेपालसम्बन्धि पोस्टर, लगायत सामाग्री वितरण गरिएको थियो । दूतावासका उपनियोग प्रमुख शरदराज आरणले हजारौं आगन्तुकबीच नेपाली कला संस्कृति प्रवर्धन र नेपाल भ्रमण वर्ष प्रसार प्रसार गर्न मेला उपलब्धिमुलक रहेको बताए ।

मेलामा प्रथम नौमती ब्याण्ड गुल्मी यूके समूहले नौमति बाजा र सयपत्री सांस्कृतिक समूहले देउडासहित तीनवटा नृत्य प्रस्तुत गरेको थियो ।

यसपटक लन्डन मेलाको १७ औं संस्करण शनिबार र आइतबार दुई दिन गरिएको हो । मेलामा एसियाली कला संस्कृति, गीत संगीत, खाना, नृत्य आदिको समिश्रण रहने गर्छ । मेला आयोजकले नेपाली दूतावासलाई विशेष प्राथमिकता दिइ वर्षेनी आमन्त्रण गर्ने गरेको छ ।