लन्डन । नेपालका चर्चित गायक दीपक बज्राचार्य सांगीतिक समूह रिदम ब्याण्डका सदस्यहरुका साथ लन्डन आइपुगेका छन् । सपन इन्टरटेनमेन्ट लिमिटेडले गर्न लागेको ‘मन मगन यूके टुर २०१९’ का लागि उनीहरु मंगलबार राती बेलायत आएका हुन् । ति कलाकारहरुलाई आयोजक सपन इन्टरटेनमेन्ट लिमिटेडका प्रवन्ध निर्देशक सपनकुमार राई, मन्जु गुरुङ राई लगायतले स्वागत गरेका थिए ।
उनीहरुको पहिलो शो यही शुक्रबार ३० अगष्ट केटिएम क्लब हयारोमा तय भएको छ । भोलिपल्ट ३१ अगष्ट सांझ अल्डरसटस्थित एम्पायर हलमा कार्यक्रम हुने सपन इन्टरटेनमेन्ट लिमिटेडका प्रवन्ध निर्देशक राईले जानकारी दिए । कार्यक्रममा दाजु भाइ व्याण्ड र डिजे एस काजीले थप मनोरन्जन प्रदान गर्ने राईले बताए । राई नेपाली फिल्म शो, कन्सर्ट, विभिन्न सांगीतिक कार्यक्रम र नृत्य प्रतियोगिता ‘यूके डान्स अफ’ का अर्गनाइजर हुन् ।
गत वर्ष सार्वजनिक बज्राचार्यको स्वर संगीत रहेको ‘कल्ले देला धन मलाई कल्ले देला धन, कल्ले देला मन मलाई कल्ले देला मन…’ गीत खुबै हिट छ । उक्त गीतको म्यूजिक भिडियोले नेवारी संस्कृति, परम्परा र सम्पदामात्र प्रतिबिम्बित गरेको छैन्, धिमे बाजा, मादल र सारंगी जस्ता मौलिक वाद्यवादनहरुको समिश्रणले गीत थप ऐतिहासिक बनेको छ ।
वि.स. २०४७ साल देखि सांगीतिक यात्रामा होमिएका हुन् दीपक । विशेषगरि पश्चिमा गीत संगीतले प्रभावित उनी यसपटक फरक शैलीको ‘मनमगन’ गीतले नयां पुस्तामाझ लोकप्रियता कमाइरहेका छन् । ‘ओ अमिरा’ गीतमार्फत गायकको छवि बनाएका बज्राचार्यको ‘मायाको डोरीले’, ’कालीकाली’ आदि गीत चर्चित छन् ।
तस्बिर- शंकर श्रेष्ठ/प्रोडक्सन थ्री
