फेसबुकबाट उम्मेदवार, सस्तो लोकप्रियतापछि गायब

लन्डन । गैर आवासीय नेपाली संघ बेलायतको १४ सेप्टेम्बरमा हुने निर्वाचनका लागि आइतबार उम्मेदवारी मनोनयन भएको छ । निर्वाचन समितिका अनुसार, ७४ पदका लागि ११७ जनाले उम्मेदवारी दिएका छन् । केही पदका उम्मेदवारहरुविरुद्ध दावी विरोध आएका र मनोनयन फिर्ताको समयसीमा मंगलबारसम्म भएकाले उम्मेदवार संख्या घटबढ हुने देखिन्छ ।

यहां चर्चा ति उम्मेदवारहरुको होइन, जसले दर्तामै 
भारी रकम खन्याए । रातदिन चुनावी चटारोमा छन् । बरु चुनाव आउनु तीन महिनाअघि देखि नै फेसबुक र अनलाइन समाचारबाट उम्मेदवार बन्छु भनेर सस्तो लोकप्रियता कमाउने केही पात्रको चर्चा यहां गर्न लागिएको हो ।

सम्भवतः सबैभन्दा बढि हल्ला र सस्तो लोकप्रियता खोज्नेमा देखिए गैर आवासीय नेपाली संघ बेलायतका महासचिव आर के त्रिपाठी । ‘हामीले दुई वर्षमा के गर्यौं’ भन्दै उनले एयरपोर्टमा नेता बोकेदेखि, कोठे बैठक, खादा सम्मान र हरेक कार्यक्रमका झिनामसिना कार्यक्रमको ‘फेसबुक लाइभ’ भिडियो समेत सेयर गर्न बांकी राखेनन् । उनले फडिन्द्र भट्टराईले औपचारिक घोषणा गरेलगत्तै म महासचिवमा ‘ह्याट्रिक’ गर्ने भन्दै केही थान अन्तर्वार्ता दिन पनि भ्याए । कतिपयले उनको त्यो ‘सतही’ घोषणालाई रुचाएका पनि थिएनन् । किनकि अरुले बोकेको भरमा महासचिव पदमै फेरि लड्छु भन्नु पदलोलुपताबाहेक अरु थिएन । तर, अन्ततः उनी अधिवेशन तोकिएको अघिल्लो दिन नेपालतिर उडे सपरिवार । नेपाल लागेपछि उम्मेदवारी दर्तामा उपस्थित हुने कुरै भएन ।

महासचिवमै लड्छु भनेर खुब उचालिएका बलराम मैनालीको पनि दर्ता कार्यक्रममा नाक मुख देखिएन । कार्यसमितिमै नरही एकैचोटी महासचिव ताक्नु उनको सस्तो लोकप्रियता बटुल्ने उद्देश्यबाहेक केही थिएन । आखिर उनले त्यो प्रमाणित गरे ।

एनआरएनए यूकेको साधारण सदस्यमात्र भएका फूलप्रसाद 
कंडेल पनि उपाध्यक्षमा लड्छु भनेर केही थान शुभकामना लिन भ्याए । फेसबुकतिर अनुहार देखाए तर दर्ता गर्ने दिन गायब भए उनी ।

गैरआवासीय नेपाली संघ यूके महिला संयोजकमा उठ्न बडो आतुर गरेर समाचार लेखाएकी गायिका अन्जु श्रेष्ठ पनि दर्ता कार्यक्रममा गायव भइन् ।  

यी त केही उदाहरणमात्र हुन् । निर्वाचन तिथी तय भएको छैन्, निर्वाचन समिति बन्न बांकी छ तर सस्तो चर्चाका लागि ‘म पनि उठ्छु’ भन्दै उत्साहित हुनेहरु यो पटक पनि केही समयपछि दुलो पसे । कतिपयलाई चर्को उम्मेदवारी शुल्कले आंट्ने साहस पनि नदिएको हो ।

चुनाव आउन नपाउंदै उठ्छु भनेको भरमा समाचार बनाइदिने हामी पत्रकारहरुको पनि यसमा गल्ती छ । औपचारिक कार्यक्रम गरेको हुन्न, उसको बोली कतिसम्म ओजिलो छ त्यो नापेको हुन्न तर पत्रकारहरु समाचार बनाउन हतार गरिहाल्ने परिपाटी विकृतिकै रुपमा विकसित हुंदैछ । समाजसेवाको नाममा सिन्को नभांच्नेहरु जब जब चुनाव नजिकिन्छ, अनि उम्मेदवारी दिने भन्दै हल्ला गर्छन् । तर, पछि ति प्रायोजक नभेटिए वा कसैको साथ नपाए बीचमै सेलाउंछन् । हामीले तिनैलाई प्रश्रय दिएका छौं ।

पहिला उपल्लो पद ताकेर दर्ताको दिनसम्म तल झर्नेहरुको लिष्ट पनि लामै छ । यद्यपि, उनीहरु सहमतिका लागि लचिलो बन्दै आफूले त्याग गरेको दावी गर्छन् ।

एनआरएनए यूके सचिव भइसकेका नारायण पौडेल गाउंले यो पटक तल झरेर इंग्ल्याण्ड राज्य समितिको सचिवमा फेरि उठ्दैछन् । एनआरएनए यूके अध्यक्ष योगकुमार फगामी आइसीसी उपाध्यक्षमा लड्ने हल्ला पिटियो तर उनले पछि बेलायतबाट प्रतिनिधित्व गर्ने आइसीसी सदस्यमा उम्मेदवारी दिए जसविरुद्ध दावी विरोध आएको छ ।

अनि अरुले उम्मेदवारी शुल्क हालिदिएको भरमा अगाडि सर्ने अर्को पंक्ति पनि छ । अब समाजसेवालाई मागी खाने भांडो वा चर्चाको माध्यम बनाउनेलाई निरुत्साहन जरुरी भइसकेको छ ।