३३ वर्षपछि गृहनगरमा कन्सर्ट गर्दै पूर्व काउन्सिलर गुरुङ

लन्डन । बेलायतमा नेपाली मुलका पहिलो काउन्सिलर धन गुरुङले ३३ वर्षपछि आफ्नो गृहनगरमा कन्सर्ट गर्ने भएका छन् । युवावस्थामा सांगीतिक कार्यक्रम गरिरहने माटोमा उनको पुनरागमन हुनेछ यही फेब्रुअरी १५ तारिख । ‘हिमालयन व्याण्ड टु’ का गायकका रुपमा गुरुङलाई पुनः सांगीतिक मञ्चमा स्वागत गर्न आतुर छन् मेचीनगर नगरपालिकावासी ।

‘दि गोर्खा मेमोरियल फाउण्डेशन नेपाल’ र काकरभिट्टा भेट्रान फुटबल क्लबले संयुक्त रुपमा आयोजना गर्न लागेको ‘एन इभिनिङ वीथ धनकिरण गुरुङ’ मा विशेष आकर्षण हुनेछन् उनी ।

मेचीनगर नगरपालिका ६ स्थित काकरभिट्टा स्कुल फुटबल मैदानमा उक्त च्यारिटी कन्सर्ट हुन लागेको गुरुङले जनाए । कन्सर्टबाट संकलित रकम स्थानीय स्तरमा शिक्षा, स्वास्थ्य र युवाहरुको खेल विकासका लागि खर्च गरिने पनि उनले जानकारी दिए ।

उनले आफ्नै कम्पोजका म हो नेपाली, मेरो देश नेपाल, जिन्न्दगीको के छ भरोसा, सोल्टिनी नानी, मेरी आमा लगायत गीत प्रस्तुत गर्ने तयारी गरिरहेका छन् । ‘आफ्नै घर आंगनमा आफन्त, पुराना दौंतरी र नयां पुस्तामाझ गीत गाउन म ज्यादै उत्साहित छु’- होम स्टुडियोमा रिहर्सलका बेला भेटिएका गुरुङले सुनाए ।

तीन घण्टा लामो कार्यक्रममा प्रख्यात हांस्य कलाकार मनोज गजुरेल र गायिका मेलिना राईले पनि साथ दिंदैछन् । इगल म्यूजिक सिस्टम झापाले साउण्ड सिस्टम व्यवस्था गर्नेछ । स्थानीय प्रशासनले पनि सहयोग गर्ने प्रतिवद्धता व्यक्त गरेको गुरुङले बताए । ‘स्थानीय मेयर विमल आचार्यले सानो हुंदा मेरो सांगीतिक कार्यक्रम खुब हेर्ने रहेछन् । लामो समयपछि गृह नगरमा फेरि धन दाईको ऐतिहासिक कार्यक्रम हेर्न पाइने भयो भनेर उत्साहित भएको मलाई बताएका छन्’- गुरुङले भने ।

अध्ययन र ब्रिटिश आर्मीमा भर्ती भएपछि उनले गृहजिल्ला छाडेको ३३ वर्ष भएको थियो । यस बीचमा गुरुङ बेलायतमा पहिलो नेपाली काउन्सिलर बनेर नाम मात्र कमाएनन्, बेलायतको स्थानीय राजनीतिसंग निकट हुने अवसर पनि जुराए ।

कन्सर्टका लागि यही २५ तारिख नेपाल जाने तयारीमा छन् उनी । सोही अवसरमा गुरुङको ‘यात्रा’ नामक एल्बम समेत विमोचन गर्ने कार्यक्रम छ ।

गोर्खा मेमोरियल फण्ड यूकेका अध्यक्ष गुरुङसंग यूकेका ५ जना अग्नी नियन्त्रकहरु पनि यात्रामा सहभागी हुनेछन् । ति अग्नी नियन्त्रक गुरुङकै पहलमा मेची नगरपालिका-६ मा अग्नी नियन्त्रणको विशेष तालिम दिन जान लागेका हुन् । आगो निभाउन प्रयोग गरिने सामान झण्डै एक टन र २ वटा ठूलो जेनेरेटर समेत प्रदान गर्ने गुरुङको योजना छ ।