‘प्रसाद’ चलचित्र प्रदर्शनका लागि नायिका नम्रता श्रेष्ठ युके आउँदै

लण्डन । आफू अभिनित चलचित्र ‘प्रसाद’को प्रदर्शनका लागि नायिका नम्रता श्रेष्ठ युके आउने भएकी छिन् ।

नेपालमा दोस्रो सातामा प्रदर्शन भइरहेको चलचित्र ‘प्रसाद’लाई युकेमा लेक्स लिम्बु, ह्याब अ मोमेण्ट र जी नाइन इन्टरटेनमेन्टस्ले प्रदर्शन गराउन लागेको हो ।

आयोजकमध्येका एक लेक्स लिम्बुले नम्रताको भिजा लगायत प्रक्रिया पूरा भइसकेको बताए । उनका अनुसार जनवरी ५ मा एबरडीन, जनवरी ११ मा स्टाफोर्ड, जनवरी १२ मा अल्डरसटमा सो चलचित्र प्रदर्शन हुने तय भइसकेको छ भने प्लमस्टिड, ह्यरो, ग्रेज, मेडस्टोन, योर्क, ब्लाण्डफोर्ड, फोल्कस्टोन, बुलफोर्ड, रेडिङ लगायतका स्थानमा पनि सो चलचित्र देखाइने बताइएको छ ।

नायिका नम्रता श्रेष्ठ भने प्रिन्सेस हल अल्डरसटमा हुने कार्यक्रममा मात्र सरिक हुनेछिन् । चलचित्र हेर्न अग्रिम बुकिङका लागि १२ पाउण्ड र गेटमा १५ पाउण्ड टिकट दर राखिएको छ ।

यसबाहेक नम्रता किंग्स कलेज लण्डनमा जनवरी ११ मा किंग्स कलेज लण्डन नेपलिज सोसाइटीले आयोजना गर्ने प्रश्नोत्तर कार्यक्रममा समेत उपस्थित हुनेछिन् । यस्तैगरी, जनवरी १३ मा अल्डरसटस्थित डि लाउञ्जमा लेक्स लिम्बुले नम्रतालाई अन्तर्वार्ता लिने छन् ।  सो अवसरमा उनीसित तस्वीर खिच्न र भेट्न समेत पाइनेछ ।

प्रसादमा नम्रताका अलावा विपिन कार्की, निश्चल बस्नेत, बसुन्धरा भूषाल लगायतको भूमिका छ भने नोभेम्बर रेन, क्लासिक र प्रभाजस्ता चलचित्र निर्देशन गरिसकेका दिनेश राउतको निर्देशन छ ।