पहिचान पुरस्कारका लागि सात कृति छनौट

लण्डन । पहिचान पुरस्कार कोषले हरेक वर्ष प्रदान गर्ने पहिचान पुरस्कारका लागि सातवटा कृति छनौट भएका छन् ।
पुरस्कारका संस्थापक नरेश काङमाङ राईका अनुसार छनौट भएका कृतिहरुमा उन्मुक्त पुस्ताको ‘आफर’, स्वाप्निल स्‍मृतिको ‘बाडुली र सुदुर सम्झना’, सरस्वती प्रतीक्षाको ‘नथिया’, सरिता तिवारीको ‘प्रश्नहरुको कारखाना’, नबिन जिरेलको ‘भीषण दिनहरु’, बसन्त बस्नेतको ‘७२ को बिस्मय’ र गणेश राइको ‘फोकल्यान्ड जर्नल’ रहेका छन् ।

लेखनको माध्यमबाट पहिचान मुद्दालाई जीवन्तता दिन नेपाली साहित्य, संस्कृति र कलामा पहिचानसम्बन्धी लेखिएका पुस्तकलाई सम्मान र पुरस्कृत गर्न सो पुरस्कारको स्थापना भएको हो । पुरस्कारको राशी २ लाख २ हजार २ रुपियाँ छ ।

यसअघि उक्त पुरस्कारबाट राजन मुकारुङको ‘फेरिँदो सौन्दर्य’, अर्जुन खालिङको ‘गोयाङको सुगन्ध’ र यज्ञशको ‘भुइयाँ’ पुरस्कृत भएका छन् । नेपाली साहित्यलाई सम्बृद्ध बनाउन, पहिचानसम्बन्धी अनुसन्धान र लेखनलाई सक्रिय बनाउन, पुरानो मनोविज्ञान भत्काई नयाँ बहुल समाज निर्माण गर्न पुरस्कार स्थापना गरिएको संस्थापक काङमाङ बताउँछन् ।

पुरस्कारको राशी हरेक पाँच वर्षमा वृद्धि गरिने पनि कोषले जनाएको छ ।