लन्डन । लन्डनस्थित एकजना समाजसेवी तथा एनआरएन अभियन्ता कृष्ण तिमिल्सेनाले धादिङको विद्यालय पुनर्निर्माणमा १३ लाख ६० हजार रुपैयां प्रदान गरेका छन् ।
तिमिल्सिनाले धादिङ निलकण्ठ नगरपालिका- १४ धुंवाकोटको सरस्वती माध्यमिक विद्यालय पुनर्निर्माणका लागि उक्त सहयोग गरेका हुन् ।
भूकम्पले विद्यालय पूर्ण रुपमा क्षतिग्रस्त भएपछि विद्यार्थी चौरमा पढ्न वाध्य थिए । केही समय अघि एक कार्यक्रमबीच चेक हस्तान्तरण भएपछि विद्यालयका प्रधानाध्यापक राजन श्रेष्ठले तिमिल्सेनाको सहयोगप्रति आभार व्यक्त गर्दै वालवालिकाको सुन्दर भविष्यमा नयां आशा थपिएको बताए ।
तिमिल्सेनाले आफूले क, ख सिकेको विद्यालयलाई त्यति रकम सहयोग गर्न पाउंदा गर्व लागेको बताए । उनले भूकम्पका बेला निलकण्ठ नगरपालिका- १४ मै अवस्थित तमैरातमाटे मावि, रातमाटेका लागि ३ लाख रुपैयां प्रदान गरेका थिए । उनले यस बाहेक पनि नेपालमा वृद्धाश्रम, मन्दिर निर्माण देखि अन्य विभिन्न मानवीय कार्यमा कयौँ पटक सहयोग गरेका थिए ।
करिब डेढ दशकदेखि लन्डन बस्दै आएका तिमिल्सेना नेपलिज सेफ एसोसिएसन यूकेका अध्यक्ष, एनआरएनए यूके पूर्व उपाध्यक्ष तथा एनआरएनए आइसीसी पूर्व सदस्य हुन् । हाल
उनी एनआरएनए केन्द्रको ट्रेड इन्भेस्टमेन्ट प्रमोसन र पोलिसी एन्ड प्रोसिडुर्स टास्क फोर्समा छन् ।
सेफ पृष्ठभूमिबाट करियर् सुरु गरेका उनी क्रियाशिल नभएको क्षेत्र केही छैन् । एक दसक देखि क्रिस फुडका प्रवन्ध निर्देशक रहेका तिमिल्सेनाले बेलायतका प्रायः च्यारिटी कार्यक्रममा सहयोगका हात फैलाउंदै आएका छन् । उनको नेपालमा हाइड्रो, माइक्रो फाइनान्स, प्रोपर्टी, बैंकिङ आदि क्षेत्रमा लगानी पनि छ ।
