बेजिङस्टोकमा तीज रमाइलो, मध्यरातसम्म नाचे दिदीबहिनी

लन्डन । बेजिङस्टोक नेप्लिज कम्युनिटी (बीएनसी) ले गत आइतबार कार्निभल हलमा तीजको दर खाने कार्यक्रम गरेको छ । विभिन्न उमेर समूहका १७५ जना दिदीबहिनी सहभागी उक्त कार्यक्रम सांझ ६ देखि राती ११ बजेसम्म धुमधामसंग चल्यो ।

समाजकै स्थानीय डिजे सन्तोष गुरुङको बेजोड तीज गीत लगायत अन्य नेपाली र हिन्दी गीतहरुमा दिदीबहिनीले भरपुर मनोरन्जन लिए । सो अलावा यसपटक सहभागीले नेपालबाट आएकी ख्यातिप्राप्त लोकदोहोरी गायिका कल्पना श्रीपालको प्रत्यक्ष गायनबाट पनि थप मनोरन्जन लिए ।

बीएनसीले हरेक वर्षको तीजबाट संकलित रकम नेपालमा कुनै संघसंस्थालाई प्रदान गर्ने गरेपनि यसपटक खर्च कटाएर बांकी रकम आफ्नै लेडिज फन्डमा राख्ने निर्णय गरेको छ ।

संस्थाले गत वर्ष राधा फाउन्डेशन 
(संस्थापक अध्यक्ष राधा पौडेल) र तनहुंमा मन्दिर निर्माणार्थ रकम पठाएको थियो भने सन् २०१६ मा धुर्मुस सुन्तली फाउन्डेशनलाई सहयोग गरेको थियो । त्यसैगरि, झमककुमारी घिमिरे, रक्षा नेपाल, विद्यालय निर्माणदेखि मुगु लगायत ठाउंमा दैवी प्रकोपका बेला पनि संस्थाले सहयोग गरिसकेको छ । सुधा गुरुङका अनुसार, बीएनसी मुख्य कमिटी, लेडिज केमिटी, बीएनसी युथ र एभरग्रीन ग्रुप बेजिङस्टोकले विभिन्न च्यारिटी गरि हालसम्म एक करोड रुपैयांभन्दा बढि रकम नेपाल पठाइसकेका छन् ।

कार्यक्रम तयारी र अन्तिमसम्म बीएनसी अध्यक्ष ओम गुरुङ, पूर्व अध्यक्ष पञ्चबीर राई, वसन्त घोताने, पान्डव सुनुवार, नर लिम्बु, रामकुमार दुमी, बल थापा, सोम चाम्स, बीएनसी युथ टिमका सौगात गुरुङ, कृश श्रेष्ठ र सुवास पुन लगायतले सहयोग गरेका थिए ।

उक्त कार्यक्रम संयोजन र सञ्चालन सुधा गुरुङले गरेकी थिइन् भने ‘राफल ड्र’ सञ्चालन पुनम गुरुङको जिम्मामा थियो ।

तीज सफल बनाउन बीएनसी लेडिज टिमका सकृय सदस्यहरु कृष्णा राई, तारा राई, मिठु गुरुङ, मन राई, चित्रा थापा, सुशिला 
गुरुङ, सुधा गुरुङ, पुनम गुरुङ, चन्द्र गुरुङ, इन्द्र गुरुङ र इन्द्र लिम्बुले महत्वपूर्ण भूमिका निर्वाह गरे ।

कार्यक्रमको मध्यमा गरिएको राफल ड्र पुरस्कारहरु गोर्खा किचनका प्रोप्रराइटर भिम गुरुङ, तृष्णा राई, इन्द्र (उर्मिला) गुरुङ, सुशिला गुरुङ, चित्रा थापा, पुनम गुरुङ, चन्द्र गुरुङ, इन्द्र (उमा) गुरुङ, तारा राई र सरला शाहीले प्रायोजन गरेका थिए ।

कार्यक्रममा पानी र पेय पदार्थ क्याप्टेन भक्त लिम्बु र श्रीमति इन्द्र, गोर्खा ग्रोसरीका प्रवन्ध 
निर्देशक बल थापा एवं बीएनसीका अध्यक्ष ओम गुरुङले उपलव्ध गराएका थिए । क्याटरिङको जिम्मा गोर्खा किचनलाई दिइएको थियो भने सेलरोटी, अचार, खीर जस्ता ‘कम्लीमेन्ट्री स्न्याक्स’ आयोजक टिमकै सदस्यले बनाएका थिए ।

सन् २००६ मा स्थापित बेजिङस्टोक नेप्लिज कम्युनिटीमा हजार भन्दा बढी विविध जातजातीका नेपाली अटाएका छन् जसमा अधिकांश बेलायती सेनाबाट अवकास प्राप्त सैनिक र तिनका परिवार छन् भने हङकङ र नेपालबाट आएका नेपालीको जमात पनि ठूलै छ ।

संस्थाले आफ्नो भाषा, कला संस्कृति जगेर्नाका लागि दशैं तिहार, नेपाली नयां वर्ष, तीज जस्ता मुख्य पर्व मनाउंदै आएको छ ।