बिहीबार, मंसिर १८ २०७७ | Thu, December 03, 2020
नेपालको समय: १९:५९ | UK Time: 14:14

मातृशिशु केन्द्र बनाउन बेलायतका नर्सले गरे च्यारिटी

वीनेपाली
२०७५ भदौ ९ गते १६:४३

लन्डन । हवील चियरको सहारा चाहिने दुई वृद्ध मेडिकेसनमा व्यस्त छन् । एम्बुलेन्सको साइरनसंगै सुत्केरी ब्यथा लागेर एक महिला अस्पताल आइपुग्दा उनीहरु हतार हतार उपचारतिर 
दौडन्छन् । दांत दुखेको पीडाले छटपटाइरहेकी एक बिरामी पनि उही समयमा इमर्जेन्सी कक्ष छिर्दा हस्याङफस्याङ दौडन्छन् 
नर्सहरु ।

शनिबार सांझ हन्स्लोस्थित प्याराडाइज ब्यांक्यूटिङ हल अस्पतालको इमर्जेन्सी कक्ष झैं बन्यो । नेपाली नर्सहरुले 
बिरामीको हेरचाह र आफ्नो व्यस्त दैनिकी सयौं दर्शककै सामुन्ने देखाए एउटा नाटकमार्फत ।

नेप्लिज नर्सिङ एसोसिएसन यूकेले भिन्न शैलीमा आफ्नो दशौं वार्षिकोत्सव मनाएको छ । एसोसिएसनले जुम्लाको सिन्जा गाउंपालिकास्थित भादगाउंमा मातृशिशु केन्द्र निर्माणका लागि आवश्यक रकम 
संकलनार्थ च्यारिटी कार्यक्रम गर्दै वार्षिकोत्सव मनाएको हो । उक्त अवसरमा नर्सहरुले केक काटेर खुशी सांटे ।

कार्यक्रमका प्रमुख अतिथी राजदूत डा. दुर्गाबहादुर सुवेदीले बेलायतका नेपाली नर्सहरु नेपालको स्वास्थ्य क्षेत्रको विकास र ग्रामीण भेगमा सिमान्तकृत बासिन्दाको स्वास्थ्य सेवामा निरन्तर लागि रहेकामा प्रशंसा गर्दै उनीहरुको प्रतिष्ठित र सम्मानित पेशा समस्त नेपालीले गौरव गर्ने पेशा भएको उल्लेख गरे ।

राजदूत डा. सुवेदीले एकतावद्ध भइ पेशालाई पवित्र बनाएर लैजान र जीवन्त र व्यापक भएको समाजमा अनुकरणीय बन्न पनि सुझाव दिए । नेप्लिज डक्टर्स एसोसिएसन (एनडिए) यूकेका अध्यक्ष डा. सविन जोशीले एसोसिएसनको समाज र मानवीयसेवा प्रेरणादायी भएको बताउंदै आफ्नो संस्थाले पनि धादिङ र 
महोत्तरीमा मातृशिशु केन्द्र निर्माण गर्ने योजना सुनाए । एनडिएले नर्सिङ एसोसिएसनसंग बेलायत र नेपालमा सहकार्य गरि विभिन्न शिविर सञ्चालन तथा नेपालमा प्राकृतिक विपत्तिमा आर्थिक सहयोग गरेको समेत डा. जोशीले स्मरण गरे ।

कार्यक्रममा रोयल कलेज अफ नर्सिङका डेपुटी प्रेसिडेन्ट रड थोम्पसन र एनआरएनए यूकेका अध्यक्ष योगकुमार फगामीले एशोसिएसनले नेपाल र बेलायतमा गरेका मानवीय कार्यको खुलेर प्रशंसा गरे ।

एशोसिएसनकी अध्यक्ष प्रसुना कंडेलले सहयोगी सबैप्रति धन्यवाद ज्ञापन गरिन् । उनले मातृशिशु केन्द्र बनाउन करिब ६० लाख (४२ हजार पाउण्ड) आवश्यक भएकामा हालसम्म च्यारिटीसहित चन्दाबाट करिब २० हजार पाउण्ड संकलन भएको जनाइन् । प्रतिवद्धता रकम आउन बांकी रहेकाले अन्तिम हिसाब छिट्टै सार्वजनिक गरिने जनाउंदै अध्यक्ष कंडेलले सहयोगदाता र सहयोगी सबैप्रति आभार व्यक्त गरिन् ।

‘संस्थाको यो गरिमा र विश्वसनीयता बढ्न सबैजनाको ठूलो योगदान छ’, केही भावुक बनेकी उनले भनिन्, ‘मैले गल्तीवश केही बिगार भएको भए पनि माफ गरिदिनुहोला । सबैको नाम उल्लेख गर्न सम्भव छैन् तर संस्थाप्रति सबैको गहन भूमिका रहेकाले म आभारी छु ।’ उनले एसोसिएसनले सिन्धुपाल्चोक र गोरखामा एक एक वटा विद्यालय निर्माण गरिसकेको जनाउंदै जुम्लाको मातृशिशु केन्द्र तेश्रो महत्वाकांक्षी प्रोजेक्ट भएकाले अन्यलाई समेत सहयोग गर्न अपिल गरिन् ।

सो अवसरमा अध्यक्ष कंडेल, कार्यक्रमका विशेष अतिथी रोयल कलेज अफ नर्सिङका डेपुटी प्रेसिडेण्ट प्राध्यापक रड थोम्पसन र अल पाकिस्तान नर्सिङ एशोसिएसनकी अध्यक्ष जेबा आरिफले एसोसिएसनको तेश्रो स्मारिका विमोचन गरे । स्मारिकामा नर्सहरु र अन्यका लागि उपयोगी सामाग्री प्रकाशित छ ।

कार्यक्रममा संस्था स्थापनाको दशक लामो अवधिमा महत्वपूर्ण योगदान पुरयाउने संस्थापक अध्यक्ष अजिता सिम्खडा, पूर्व अध्यक्षत्रय शान्ता संग्रौला, बासु लामिछाने र सुशीला कार्की, सल्लाहकारहरु टुका स्याण्डवेल क्षेत्री, मन सुनुवार, राजेन्द्र क्षेत्री लगायतलाई विशेष सम्मान गरियो । एसोसिएसनले नेपालका चर्चित हांस्यव्यंग्य कलाकार एवं साहित्यकार शैलेन्द्र 
सिम्खडालाई पनि सम्मान गरेको थियो ।

कार्यक्रममा मातृशिशु केन्द्रको सहयोगार्थ लक्ष्मी राई (लारा) ले विभिन्न चित्रकलाको अक्सन गराइन् भने ‘राफल ड्र’ पनि गरिएको थियो ।

कार्यक्रमको दोश्रो चरण सुनिता गौतमले सञ्चालन गरेकी थिइन् जसमा प्रमुख आकर्षण रहेका स्टयाण्ड अप कमेडियन शैलेन्द्र सिम्खडाको राजनीतिक तथा सामाजिक विकृतिविरुद्धको व्यंग्य सुनेर राजदूतसहित दर्शक पेट मिची मिची हांसे ।

गायिका शर्मिला बर्देवा र आशिष राजले गायन प्रस्तुत गरे भने सुस्मिता थापा र ग्रीष्मा भुषालको मारुनी नृत्यबाट गरिएको स्वागत आकर्षक देखिन्थ्यो । कार्यक्रममा काव्या दाहाल र दिव्या दाहाल एवं पारिका आले र प्रतिष्ठा त्रिपाठीको जोडीले पनि नृत्य देखाए । स्वर्गीय कलाकार श्रीदेवीको समर्पणमा भारतीय मुलकी नर्स एलिजा म्याथ्यूले एक नृत्य र रफी श्रेष्ठले बांसुरी धुन सुनाइन् ।

अन्तिममा हेम बिष्टको डिजेमा नाचेर सहभागीले भरपुर मनोरन्जन लिए ।

तस्विरहरु- शिव भण्डारी

प्रतिक्रिया

सम्बन्धित सामाग्री

फेसबुक